Удахгүй МАН-ын нийслэлийн намын хорооны хурал болох гээд тунчиг бужигнаантай байна. Тиймээс МАН-ынхан бараг л хоёр хуваагджээ. МАН-ынхан ч гэж дээ хотын бүлэг нь хоёр хуваагдсан гэвэл илүү зохимжтой юмуу даа. Учир нь МАН дахь хотын гэх бүлэг нийслэлийн намын хороогоо алданаа л гэж байхгүй. Гэхдээ хэнийг дарга болгох вэ гэдэг дээрээ л хоёр хэсэгт хуваагджээ.

    Эх сурвалжийн мэдээлж байгаагаар одоогийн дарга Ц.Сандуйгаасаа салахгүй бол ирэх сонгуульд нийслэлд ялахгүй гэдгийг дээр дороо сайн ойлгох болжээ. Учир нь Ц.Сандуй нийслэлийн МАН-ын дарга болсноосоо хойш нэг ч олигтой ажил хийгээгүй. Тэр ч бүү хэл Улаанбаатарын намын үүрийн гишүүд нь Ц.Сандуйгаа танидаггүй аж. Саяхан тэрээр Улаанбаатарын бүх л үүрийнхэнтэй уулзсан байна. Олон үүр дээр Ц.Сандуй нийслэлийн намын хорооны дарга юмуу гэх мэт яриа гарчээ. Тэгээд ч Ц.Сандуйг газрын асуудалтай холбогдуулах элдэв яриа тасардаггүй. Өөрөөр хэлбэл Ц.Сандуйг Улаанбаатарын газрын наймаачид, барилгын бизнес эрхлэгчид л сайн мэдэх болохоос жирийн ард иргэд, сонгогчид мэдэхгүй.

    Харин саяхан Ц.Сандуй нийслэлийн бүх үүрийн гишүүдтэй уулзахдаа УИХ-ын гишүүн, Нийслэл хариуцсан нарийн бичгийн дарга Д.Сумьяабазартай хамт явжээ. Уулзалтын дараа аварга гишүүнд бяр амтагдах болсон байна. Өөрөөр хэлбэл отгон гишүүн өөрийгөө Ц.Сандуй гэгчээс хамаагүй илүүгээ ойлгож авчээ. Ингээд Нийслэлийн МАН-ын хорооны даргад өрсөлдөж болохоо найз нөхөддөө дуулгасан байна. Найз нөхөд нь намынхаа удирдлагад дуулгаж. Гэтэл М.Энхболд дарга Д.Сумьяабазарыг дэмжиж байгаагаа илэрхийлжээ. Ингээд түүний зам шулуудах шинжиндээ орчээ.

    Харин сул дорой гэсэн имиж бүрдүүлээд байгаа Ц.Сандуй намын даргынхаа энэ шийдэлд тунчиг таагүй хандах болжээ. МАН-ын даргын шийдлийг дагаад тус дүүргийн намын хорооны дарга нар Д.Сумьяабазар гишүүнийг дагаж гүйх болсон шинэ мэдээлэл ч ирэв. Гэсэн ч Ц.Сандуйтайгаа яваад дуусая гэх гишүүд ч багагүй байгаа бололтой.

    Ийнхүү МАН-ынхан газрын асуудалд холбогдож эцэстээ хотын даргын эсрэг ганц ч үг дуугарч чадахгүй суугаа Ц.Сандуйгаа аварга Д.Сумьяабазараар солих шинэ ажлыг 3 сарын нэгнээс өмнө хийж амжуулах болсон талаар эх сурвалж мэдээллээ.