“Шударга ёс” эвсэл “АН”-аас нүүр буруулах болсныг олон үйл явдал нотлох боллоо. Тус бүлэгт харьяалагддаг УИХ-ын гишүүн Ц.Оюунбаатар “Засгийн газрын хувь заяаны асуудал хөндөгдөж магадгүй” болсон тухай хэвлэлд ярилцлага өгсөн бол МАХН-ын Ерөнхий нарийн бичгийн дарга Г.Шийлэгдамба “ АН-тай хэлэлцэж тохирсон зүйлүүд хэрэгжихгүй байна. Үүн дээр манай намынхны зүгээс сэтгэл дундуур байгаа. Нэгэнт хамтарч ажиллаж байгаа учраас улстөрийн соёл байх ёстой. Ер нь АН болон “Шударга ёс” эвслийн  хамтын ажиллагаа  үр дүнтэй, тогтвортой байхын төлөө өнөөдрийг хүртэл ажиллаж ирлээ.Тиймээс манай намын зүгээс зохих түвшинд гаргаж тавих асуудал байна. Үлдэж байгаа цаг хугацаанд зөвхөн Засгийн газарт ажиллахын төлөө зүтгэхээс илүү МАХН-ын гишүүд, Монголын ард түмний эрх ашгийн төлөө ажиллах нь чухал юм.” гэж ярьжээ Дарааллан хэлсэн эдгээр үг Засгийн газарт багтаж байгаа хоёр гол улстөрийн хүчний хооронд үүссэн хагарал Н.Алтанхуягийн багийг хөмрүүлэх хэмжээнд хүрснийг харуулж байна.

    Бүтэн хоёр жилийн турш таг чимээгүй явсан “шударга ёс” эвсэл гэнэт “таван хувьсгал” гээч сонгуулийн мөрийн хөтөлбөртэй байснаа санав бололтой. Ингээд ард түмний эрх ашгийн төлөө, шударга ёс тогтоохын төлөө дэвшүүлсэн мөрийн хөтөлбөрийг АН-ынхан огт дэмжихгүй, хэрэгжүүлэхгүй байгааг гүн гүнзгий ухаарснаа хэвлэлээр мэдэгдлээ. Тэд намын даргатайгаа золгуут хийхээс өмнө эрх баригчдад хариуцлага тооцох асуудалд ямагт АН-тай эвсэж байсан бол Солонгос мордож ирмэгцээ ийм шийдэмгий байр сууриа илэрхийлэх болсон нь гарцаа байхгүй Н.Энхбаяр шатрын хөлгөө нүүж эхэлснийг харуулж буй хэрэг юм. 

    Удахгүй эхлэх хаврын чуулганаар хэлэлцэхээр болсон давхар дээлийг дан болгох хуулийн төслийг “шударга ёс” эвсэл “МАН”-ын гишүүд дэмжих нь тодорхой болж үүндээр намынхантайгаа ил цагаан тулалдах болсон Р.Амаржаргал эсвэл бие даагчдаас аль нэг нь л нэмэгдэхэд Засгийн газрыг дахин шинээр байгуулахаас өөр замгүй болж байгаа. Иймд АН-д МАН-тай эвсэх үү, Н.Энхбаяртай нийлэх үү гэдгээс өөр сонголт үлдээгүй гэдгийг улс төрийн ойрын эх сурвалжууд хэлж байгаа. Тэгвэл АН-ынханы дунд “Н.Энхбаярыг дахин төрийн өндөр албан тушаалд томилж болохгүй. Тэрний оронд МАН-тай хамтарсан нь дээр” гэсэн байр суурьтай гишүүд ч цөөнгүй байгаа аж. Харин МАН-ын бүлгээс Засгийн газарт орж ажиллахгүй гэдгээ мэдэгдсэн. Хэдий ийм ч АН-ын зүгээс албан ёсоор санал тавибал МАН-ын удирдах зөвлөл, бага хурлаар асуудлыг хэлэлцэх магадлал өндөр. Харин Н.Энхбаяр болон түүний нөхдөд энэ хувилбар таалагдахгүй нь ойлгомжтой.

    Ийм учраас МАХН “Хэрвээ Н.Энхбаяртай хамтрахгүй бол Засгаас гарна” гэсэн мессежийг АН-д илгээж байгаа бол АН зөрүүлээд “Хэрвээ та нар давхар дээлийг дан болгох юм бол буцаад МАНАН байгуулна” гэсэн мессежийг зөрүүлж шидээд эхэлжээ. Ийнхүү хаврын чуулган дөхөх тусам Засгийн газрын цаашдын хувьзаяаны асуудал ихээр хөндөгдөх боллоо.

    Хэдийгээр Засгаас гарах тухай асуудлыг МАХН-ынхан намын даргатайгаа албан ёсоор яриагүй гэж байгаа ч УИХ-ын хаврын чуулган эхлэхээр “Шударга ёс” эвслийн зүгээс шаардлагатай улстөрийн үйл ажиллагааг явуулж эхэлнэ гэж ойлгож болно гэдгийг МАХН-ын Ерөнхий нарийн бичгийн дарга Г.Шийлэгдамба онцолж байгаа. Мөн тэрээр Н.Энхбаяр Засгийн газарт орох уу? гэсэн сэтгүүлчийн асуултанд “ МАХН-ын дарга Н.Энхбаярыг Монгол Улс гэлтгүй олон улсад нэртэй улстөрч гэдгийг бүгд хүлээн зөвшөөрнө. Энэ хүний  хуримтлуулсан туршлага, мэдлэг боловсролыг Монгол Улс ашиглах ёстой гэж бид үздэг. Түүнээс биш өнөө маргаашгүй ирж УИХ-ын гишүүн болж Засгийн газарт орж ажиллах талаар яриагүй. Ер нь цаг хугацаа бүхнийг харуулна. Тодорхой хугацааны дараа ямар нөхцөл байдал бүрдэх нь үү” гэж тойруу бүрхэг хариулсан байна. Түүний хэлж буйгаар  дөрвөн сараас нэг их хэтрэлгүй хуралдах намынхаа бага, их чуулганы дараа гарах шийдвэр, түүнээс үүсэх нөхцлийн дараа Н.Энхбаяр “улс орны хөгжлийн төлөө” зүгээр суухгүй нь тодорхой болж байгаа юм.