МАХН-аас цаг үеийн асуудлаар мэдээлэл хийлээ. Уг хуралд Ерөнхий нарийн бичгийн дарга Г.Шийлэгдамба тэргүүтэй хүмүүс оролцов. МАХН-ын зүгээс намынхаа Их хуралдайг ирэх дөрөвдүгээр сард зохион байгуулах байсан ч тодорхой хугацаагаар хойшлуулаад байгаа. Учир нь тус намын удирдлагууд болон Засгийн газрын гишүүд 21 аймаг, 73 сумаар явж "Шудрага ёсны аян"-ыг зохион байгуулж ажиллахаар болсон байна. Ингэхдээ орон нутгийн иргэдтэй уулзаж МАХН болон “Шударга ёс” эвслийн хийж, санаачилж байгаа ажлууд, мөрийн хөтөлбөрийн хэрэгжилтийн талаар санал бодлыг нь сонсох аж. Харин үүний дараа Их хуралдайг зохион байгуулахаар товыг зарлана гэлээ. Мөн намын дарга Н.Энхбаярын биеийн байдлыг харзнаж байгаа учраас Их хурлыг яг дөрөвдүгээр сард гэж товлож чадахгүй байгаа аж.

Энэ үеэр МАХН-ын Ерөнхий нарийн бичгийн дарга Г.Шийлэгдамбаас зарим зүйлийг тодрууллаа.

-    МАХН-ын гишүүд намын дарга Н.Энхбаярыгаа эргээд ирсэн. Энэ үеэр Засгаас гарах асуудлыг ярьсан гэсэн мэдээлэл байна. Энэ талаар та ямар тайлбар хийх вэ?

-    Манай намын удирдлагууд, Засгийн газрын гишүүд БНСУ-д очиж намын даргатай золгох үйл ажиллагааг зохион байгууллаа. Золголтод тэнд амьдарч байгаа монголчуудаас бүрдсэн 200 гаруй хүн цуглалаа. Н.Энхбаярын биеийн байдал хэвийн, дээрдэж байна. МАХН засгаас гарах болон өөр бусад асуудлын хувьд албан ёсоор яригдаагүй гэж хэлмээр байна. МАХН Засгийн газрыг тогтвортой ажиллах ёстой гэсэн байр сууриа өөрчлөөгүй.

-    Н.Энхбаяр дахин баригдах шалтгаантай учир Монголд ирэхгүй, МАХН-ынхан даргыгаа ирнэ хэмээн шоудаж байна гэсэн мэдээлэлд ямар хариулт өгөх вэ?

-    Н.Энхбаяр дарга эх орондоо ирэх нь гарцаагүй. Мөн өөрөө удахгүй болох Их хуралдайд оролцох бодолтой байгаа. Харин энэ асуудал түүний биеийн байдалтай холбоотойгоор шийдэгдэнэ. Намын гишүүд ч Н.Энхбаяр даргыг Их хуралдайд оролцоосой гэж хүлээж байгаа.

-    Таныг албан тушаалаас тань огцруулна гэсэн яриа нам дотор чинь яригдсан гэсэн. Энэ үнэн үү?

-    Энэ талаар албан ёсны мэдээлэл алга.