АН-ын сүүдрэвчинд удтал дуугүй суусан МАХН гэнэт чанга дугарах болж ойр ойрхон “Засгийн газрын чинь хувь тавилан бидний гарт байгаа шүү, аятайхан байгаарай” гэж агсамнах болжээ. Тэдний тавьж буй эх оронч шаардлагын ард “Н.Энхбаярын мэдлэг туршлагыг улс орны хөгжилд ашиглах” ганцхан зорилго бий. Харин  АН түүнтэй нэг завинд суух үгүй дээр байр суурь нь хоёр хуваагдах болжээ. Улс төрийн хоёр гол хүчин болох МАН, АН хоёрын альнийх  нь бодлого явах вэ гэдэг салаа гортигны оройд Н.Энхбаяр гараад суучихсан учир түүнээс олон зүйл хамаарсан хэвээр байна.  Н.Энхбаяргүйгээр цаашаа юу ч явахгүй шүү”  гэдгийг МАХН-ынхан хамтрагчиддаа сануулж МАН-тай хавсайдан хаврын чуулганы жагсаалтыг унагасан нь АН-ын бодлогыг 2012 оноос хойш тасалдуулсан анхны тохиолдол бөгөөд сануулга болсон билээ . Харин АН-д Н.Энхбаярт дахин эрх мэдэл өгснөөс МАНАН байгуулж азаа сорьсон нь дээр гэж үзэх хүмүүс цөөнгүй байна. МАН-д санал тавибал татгалзахгүй байх нь зөв гэсэн байр суурьтай хүмүүс байгаа гэх бор шувуу нисээд эхэлсэн. Энэ ажиллагааг АН-аас Х.Баттулга, МАН-аас Т.Бадамжунай нар зохион байгуулж байгаа гэж зарим хэвлэлээр мэдээлсэн билээ  Н.Энхбаярын хувьд аль аль хувилбар нь нэмэх оноо авчрахаар болоод байна. Тодруулбал тэр Засгийн газарт орж ирвэл эрх мэдэлд хүрнэ. Эрх мэдэл байгаа цагт цаашдын улс төрөө удирдаад явах хангалттай хэмжээний мэдлэг, туршлага түүнд бий. Буцаад МАНАН байгуулагдвал тэр хамгийн сайн сөрөг хүчин болж ард иргэдээс дэмжлэг авч ирэх сонгуульд барьцаа улам ахиулах боломж бүрдэнэ. Цөөнхийг удирдаж парламентанд 72 суудалтай олонхи болгосон туршлага ч түүнд бий. Ийнхүү энэ хаврын улстөрийг дэглэх нь тодорхой болсон Н.Энхбаяр урьдын дайснуудаасаа өшөө авах ажиллагаа эхлүүлснийг эх сурвалж онцолж байна. Түүний эхний бай нь Т.Бадамжунай болжээ. Чухам яагаад Т.Бадамжунайгаар эхлэх болсныг гурван янзаар тайлбарлаж байна.

    Нэгдүгээрт: Т.Бадамжунайтай хувийн тооцоотой. Түүнийг Ерөнхийлөгчийн сонгуульд унахаас эхлээд намдаа шахагдаж, улмаар баригдаж хоригдох бүх операцид гол хор хутгасан хүнийг Т.Бадамжунай гэлцдэг.

    Хоёрдугаарт: МАНАН байгуулах операцийг МАН-аас зохион байгуулж буй хүнээр Т.Бадамжунайг нэрлээд байгаа. Эрх мэдлээс олон жил хол явсан Н.Энхбаяр  сиймхийг алдахыг хүсэхгүй байна. Тиймээс Т.Бадамжунайтай холбоотой авилга, гэмт хэргийн тухай мэдээллүүдийг цуглуулж, дэс дараалалтай “гөвөх” үүргийг өөрийн эзэмшлийн “Зууны мэдээ” сонин “ТВ-9”- д өгсөн гэж эх сурвалж хэлж байгаа.

    Гуравдугаарт: МАН-ын сонгуульд нэр дэвшүүлэх болон албан тушаалын томилгооны хуваарилалт Т.Бадамжунайгүйгээр болдоггүй гэлцдэг. Хэнийг хаана дэвшүүлэх, хэнийгээ буланд шахах, дүнд нь гарах алдаа, ашгийг хамгийн мэргэн тооцдогоороо түүнийг гүйцэх сийрэг толгой МАН-д өнөө хэр ховорхон гэдгийг Т.Бадамжунайг түшдэг хотын фракцынхан ярьдаг. Тэрээр МАН-ын даргад М.Энхболд, Ерөнхий нарийн бичгийн даргад Ж.Мөнхбат нарыг гаргаж ирэх гол хорыг хутгасан хүн гэдэг бөгөөд энэ тухай МАН-ын нарийн бичгийн дарга асан Ж.Сүхбаатар “Манай улсын авлигын загалмайлсан эцэг бол Т.Бадамжунай тэргүүтэн…” гэж твиттертээ бичсэн билээ. Хэрвээ Н.Энхбаяр Т.Бадамжунайг зайлуулж чадвал М.Энхболдтой шатар өрөхөд хөнгөхөн мад тавьна гэдгээ тооцоолж байгаа. М.Энхболдыг нийгэм ч нам нь ч хүлээж авахгүй байгаа энэ завшаан дээр тоглолт хийж МАХН-ынхаа эгнээг хүчирхэгжүүлэх улс төрийн тооцоо түүнийг тулаанаа ингэж эхлүүлэх тактикруу хөтөлж байна гэдгийг эх сурвалж онцоллоо. Т.Бадамжунайгийн хувьд төвсийн хөрөнгөөс 500 сая төгрөгийг хувьдаа завшсан хэргээр шалгагдаж байсан ч прокрурт шилжээд чимээгүй болсон. Харин энэ бүхнийг сэргээж Т.Бадамжунайг намнах ажиллагааг ийнхүү Н.Энхбаяр эхлүүлж байна.