УИХ-д архитай холбогдсон 10 гаруй гишүүн байдаг. Тодруулбал,  УИХ-ын гишүүдийн дунд архины үйлдвэртэй нэгэн байхад архи, согтууруулах ундааны төрлийн бүтээгдэхүүн импортлодог, өөрийн сүлжээ дэлгүүрүүдээр борлуулдаг, баар цэнгээний газар ажлуулдаг гишүүд ч цөөнгүй юм.

Архины тухай хуулийг шинэчлэхэд саад болж буй зарим зүйлийн нэгд мэдээж дээрх хүмүүсийн үзэл бодол нөлөөлнө. Тэд "албаар" архийг хязгаарлахаар өргөн барьсан хуулийн төслүүдийг огт хэлэлцүүлэхгүй замхруулдаг ч байж мэдэх.

Юутай ч УИХ-аас архиар дагнан бизнес хийдэг гишүүдийг танилцуулья.
1. УИХ-ын гишүүн Г.Батхүү  "АПУ"-гаас гадна "Улаанбаатар спирт" гэх компанитай.
2.УИХ-ын гишүүн Л.Энх-Амгалан  "MCS" группийн охин компани "Спирт бал бурам", "Tiger" компанийн эзэмшдэг.
3. УИХ-ын гишүүн, Уул уурхайн сайд Д.Ганхуяг "Эвридэй" сүлжээ дэлгүүрүүдээрээ архи, согтууруулах ундааны төрлийн бүтээгдэхүүнийг худалдаалан борлуулдаг.  Сүүлийн үед өөрийн мэдлийн "Сансар бридж" компаниараа дамжуулан Японоос шинэ төрлийн архи оруулж ирсэн.
4. УИХ-ын гишүүн, Эрчим хүчний сайд М.Сономпил согтууруулах ундааны бизнестэй гишүүдийн тоонд зүй ёсоор орно.  Тэрбээр "Залуу Монгол" корпорацийн эзэн бөгөөд "Чингис" сүлжээ ресторан болон шар айрагны бизнестэй.

 Мөн Р.Амаржаргал гишүүний мэдлийн "Хишиг Уул" төв дэргэдээ  баар, ресторантай бол Б.Наранхүү Дүнжингарав" худалдааны төвдөө архины бөөний цэгтэй. Түүнчлэн, Ц.Баярсайхан гишүүн Өмнөговь аймагт хүнс, архи согтууруулах ундааны  үйлдвэрлэл, бөөний худалдааны чиглэлээр үйл ажиллагаа явуулдаг "Говийн өндөр" гэх компанитай,  Б.Чойжилсүрэн гишүүн  хүнсний импорт, бөөний худалдааны чиглэлээр үйл ажиллагаа явуулдаг "Хурд хүнс" нэртэй охин компанитай юм.

Тэгэхээр УИХ-д архины тухай хуульд ашиг сонирхолын зөрчил илэрхийлэх наанадаж найман гишүүн байна. Цаашлаад үүнээс ч олон хүн архины шинэчилсэн хуульд "эсрэг" байр суурьтай л байгаа байх.