Хэзээнээсээ гашуун хорон үгээрээ алдартай Ц.Нямдорж МҮОНТВ-ийн “та хариулахгүй байж болно” нэвтрүүлгээр оролцож тун сонирхолтой зүйл ярилаа. Тэрээр хууль зүйн салбарын шинэчлэлийг “зэрэг нэмэхийн өмнө” кино дээр гардаг шиг тал еэвэн хэдэн тийш нь харуулж буй дутуу дулимаг ажил гээд асар их зардлаар дэмий зүйл хийж байна гэж үзэж байгаа ажээ. “Чи айлын эхнэрүүдтэй твиттэрээр хэрэлдэхээс өөр ажил хийхгүй байгаа шүү" гэж УИХ-ын байнгын хорооны хурал дээр Х.Тэмүүжинг хатуу зэмлэсэн тэрээр хууль зүйн салбарын шинэчлэлийг жинхэнэ холион бантан гэж үзэж байна. Цагдаагийн газрын харьяа эрүүгийн цагдаа, мөрдөн байцаах албыг татах буулгасныг цагдааг дампууруулж байгаа гэж үзэж байгаа бол шүүхийн тойргийн систем манайд тохирохгүй гэдгийг онцолж байна. Мөн тэрээр  “Энэ хууль зүйн салбарын шинэчлэл гээд байгаа юмыг чинь 2002 онд хийчихсэн юм. Монгол Улсын эрүүгийн хууль, иргэний хуулийг шинэчилснээр шинэ цагийн хууль зүйн байшин боссон... ийм том хуулийг мэргэжлийн хүний үгийг сонсохгүйгээр хийж байгаа нь эмгэнэл.... Монголын төрд мэргэжилгүй хүмүүс мэргэжилтэй хүмүүсийг удирддаг болсноор энэ будлианы үндэс тавигдсан...  Худал, хулгай, шунал гурав Монголын төрийн алж байна зэргээр нэлээд ууртай ярьсан юм. 

    Хамгийн сонирхолтой нь тэрээр таны үгийг ардын намынхан сонсож байна уу? гэсэн сэтгүүлчийн асуултанд “бяр нь амтагдаад байх үедээ сонсохоо больчихдог юм”  гээд МАН С.Батболдыг дарга байх үед ялагдах гол үндсээ тавьсан гэдгийг ч нуусангүй. УИХ-д 45 суудалтай олонхи байх үедээ 25 суудалтай цөөнхийнхөө захиалгаар сонгуулийн хууль баталсан нь гол алдаа. Ард түмэн эрхийг нь өгсөн байхад цөөнхийнхөө захиалгаар хууль баталчихсан юм ш дээ. Ийм аймхай дарга сонгуулийн хуулиар эрх мэдлээ шилжүүлчихсэн гэв. Галзуу юм шиг зоригтой байж болохгүй, тэнэг юм шиг аймхай байж болохгүй, тэрний дундуур явах ёстой гэсэн бодолтой явдгаа нуусангүй.  Ийнхүү тэрээр өөрийг нь жагсаалтын 6-т оруулж УИХ-ын гишүүн болгосон намын экс дарга С.Батболдыгоо аймхай гэж тодорхойлж байна. Харин М.Энхболдын талаар ямар бодолтой явгийг цаг хугацаа  харуулах бизээ.