МАХН-д гишүүнчлэлээ сэргээсэн ШУ-ын гавьяат зүтгэлтэн, доктор, профессор Ж.Амгалангаас зарим зүйлийг тодруулав.

-МАХН-ыг зарим хүмүүс түүхэн нам гэж байхад нөгөө хэсэг нь дөрвөн жилийн өмнө байгуулагдсан шинэ нам гэдэг. Таны хувьд энэ тал дээр ямар бодолтой байдаг вэ?

-Монголд нам гээч зүйл 1921 онд байгуулагдах үеэс хойш л  МАХН байсан. Түүхэн 90 жил бол яалтачгүй МАХН-ын түүх. МАХН-ын явуулсан үйл ажиллагаанд эх орон минь хөгжилд дэвшилд хүргэсэн. Ийм учраас энэ намыг үгүйсгэх эрх бидэнд байхгүй. МАХН бол манай Монгол Улсын хөгжилд түүхэн их гавьяат үүрэг бүтээсэн нам юм. Бид нарыг ийм өндөр боловсролтой болгоход, намайг гарыг минь ганзганд хөлийг минь дөрөөнд хүргэж өгч бусад бүхий л дэмийг өгсөн МАХН-ын хувьсгалт намдаа баярлалаа.  Зарим хүмүүс МАХН-ыг муу хэлдэг. Тэгвэл тэр хүмүүст бууж өгөхгүй гэж хэлэе. МАХН-д элссэн нэг хүн ч гэсэн бидэнд хэрэгтэй юм шүү.

-Та хэдэн онд энэ намын гишүүн байсан бэ?
- Би 1974 онд МАН-ын гишүүн байсан. Одоо 40 жилийн дараа батлахаа сэргээж авч байна. Үүнийг сэргээгүй яваад байвал миний хуучин батлах хүчингүй байх байсан. Би өмнө нь МАН-ыг олон удаа дуудаж байхад очиж ч байгаагүй, хуралд нь оролцож ч байсангүй. Яагаад гэхээр би энэ цагийг хүлээж байсан.

-Таны хувьд МАХН-ын үйл хэрэгт цаашид хэрхэн оролцоё хэмээн төлөвлөж байна?

-Би МАХН-ын үйл хэрэгт өөрийн удирдаж байгаа ажил болох Шинжлэх ухаан, эрдэм шинжилгээний ажил, өөрийнхөө залуу эрдэмтдийг бэлтгэж байгаа энэ үйлсэд үр бүтээл гаргаж, дэлхийн түвшинд тэдний бүтээлийг гаргахаар зүтгэж оролцоно. Ингэж чадвал би намдаа, ард түмэндээ, өөртэй ч гавьяатаа яваа гэж бодож байна.
Харин хамгийн залуу гишүүн 22 настай Ч.Тэмүүжин хэлэхдээ "Манай гэр бүл удмаараа МАХН-ын хүмүүс. Харин миний хувьд энэхүү намд элсэж байгаагийн учир нь шударга ёсыг дээдэлдэг залуу хүмүүсийн нүүр царай болох зорилготой" гэлээ.