УИХ дахь МАН-ын бүлэг өнөөдөр намрын чуулганаар хэлэлцэж, шийдвэрлэсэн ажлуудаа танилцуулав. Энэ үеэр МАН-ын дарга М.Энхболдоос зарим зүйлийг тодрууллаа. - Танай намын нэр бүхий гишүүд МАХН-д элсэж байна. Энэ талаар та ямар байр суурьтай байгаа вэ?
- Өнгөрсөн баасан гаригт МАХН-ын зарим нэг удирдлагуудын хийсэн мэдээлэлтэй холбогдуулж амралтын өдрүүдэд иймэрхүү мэдээлэл хэвлэлүүдээр гарсан. Манай намын гишүүдийн хувьд намын анхан шатны байгууллагууддаа намын гишүүнчлэлээсээ татгалзаж байгаагаа мэдэгдсэн зүйл байхгүй байна. Энэ бол ор үндэсгүй яригдаж байгаа асуудал. Нөгөө талаар ганц, хоёр хүн шинээр байгуулагдсан МАХН-д гишүүнээр элсэж байгаа нь хувь хүний сонголтын асуудал болох байх.
- Ерөнхий сайд Н.Алтанхуяг “Би орон тоог нэгээр нэмэгдүүлбэл эсвэл төсвийн зарлагыг нэг төгрөгөөр өсгөх юм бол огцрохоо мэдэгдье” гэж хэлж байсан. Гэтэл одоо төсөв хэтэрч, төрийн албаны бүтэц данхайсан гэж та бүхэн хэлж байна. Тэгэхээр энэ тохиолдолд Засгийн газрыг огцруулах асуудлыг хөндөх үү?
- МАН УИХ-д сөрөг хүчин болж Засгийн газар болон төр засгийн байгууллагуудыг хариуцлагатай ажиллахыг шаардаж байгаа. Мөн улс орны эдийн засагт бий болсон нөхцөл байдлыг урьдчилж харж Засгийн газарт анхааруулсан. Гэтэл одоо эдийн засгийн нөхцөл байдал хүндэрсэн байна. Валютын ханшийн өсөлт, Самурай бондын анхаарал татсан асуудлуудаас болж хариуцлагын асуудлыг ярина. Учир нь Засгийн газрын алдаатай бодлогоос болж эдийн засаг хүндэрч, ард түмний амьдрал доройтож байна. Тиймээс бид энэ Засгийн газартай хариуцлага тооцох асуудлыг тавих болно. Улс орны эдийн засагт бий болсон нөхцөл байдлыг өнгөрсөн оны наймдугаар
сард урьдчилж харж, ер нь 2013 оны сүүлч, 2014 оны эхээр эдийн засаг
хүндрэх нь гэдгийг харж ээлжит бус чуулганыг хуралдуулах талаар ярьж
байсан. Өнгөрсөн аравдугаар сард Улсын төсвийн төсөл өргөн барьснаас
хойш валютын хомсдол, өргөн хэрэглээний барааны үнэ өссөн учраас Засгийн
газрыг дотроо хариуцлага тооцож ажиллахыг олон удаа бичгээр хүргүүлж
байсан. Харамсалтай нь эрх баригчид энэ арга хэмжээг авч хэлэлцэхгүй,
өөрсдийн ажлаа болж байна, бүтэж байна гэсэн байдлаар олон түмэнд ярьж
явсаар ирсэн. Бид эдийн засаг, санхүүгийн асуудал хариуцсан сайд нарт
хариуцлага тооцох асуудлыг тавьсан. Гэвч олонхоороо хамгаалаад үлдсэн.
Энэ хавар эдийн засгийн байдал, иргэдийн амьдрал нэлээд хүндрэх төлөвтэй
байна. Сөрөг хүчнийн зүгээс Засгийн газар дотроо, өөрсдөө хариуцлага
тооцох асуудлыг нэг бус удаа тавьсан. Ер нь Засгийн газрын хийж байгаа
дараа дараагийн үйл ажиллагаатай холбогдуулж хариуцлага тооцох асуудлыг
тавина. Тэгэхээс ч өөр аргагүй.
Т.Энхэлээ
Сэтгэгдэл (8)