“Иргэний эрх нь зөрчигдөж, хэлмэгдсэн гишүүдээ хамгаалах санаачлага” сэдэвт уулзалт Тусгаар Тогтнолын ордны Бага танхимд боллоо. Уг уулзалтанд эрх баригчдын үйлдлийг эсэргүүцэж буй иргэд болон төрийн бус байгууллагынхан оролцов.

Тэд эрх баригчид сүүлийн үед иргэдийг айлгах, дарамтлах үйлдэл их хийдэг болсон гэдгийг онцолоод Ерөнхий сайдыг АТГ-д шалгуулсан иргэн Б.Энхбаяр, Т.Сайнжаргал нарын эрхийг хамгаална гэдгээ илэрхийлээ.

Иргэн Б.Энхбаяр, Т.Сайнжаргал нар нь Ерөнхий сайд Н.Алтанхуягийг АТГ-д шалгуулсан юм. Харин тэднийг Г.Алтанхуягийн нэр төрд халдаж, гүтгэн доромжилсон гэдэг зүйл заалтаар Чингэлтэй дүүргийн цагдаагийн газраас эрүүгийн хэрэг үүсгээд байгаа юм.

Б.Энхбаяр, Т.Сайнжаргал нарын хувьд Ерөнхий сайд Н.Алтанхуягийн нэр төрд халдаж, гүтгэн доромжлоогүй гэв. Тэд "Ардчилсан нийгэмд хэн нэгнийг хардах эрх нь чөлөөтэй байдаг. Бид эрх баригчдын үйлдлийг АТГ-д шалгуулсаныхаа төлөө цагдаад дуудагдах ёсгүй. Хэрвээ хууль хяналтын байгууллагад хэн нэгнийг шалгуулсан хүн бүрт эрүүгийн хэрэг үүсгээд байвал утгаа алдана" гэлээ.

Тиймээс МАН-аас цаашид эрх нь зөрчигдөж буй иргэд болон Н.Энхбаяр, Т.Сайнжаргал нарын эрх ашгийг хамгаалж ажиллана гэлээ.