Сайд нарыг “давхар дээл”-ээ хэзээ тайлах бол гэсэн хүлээлт сүүлийн үед олны дунд бий болоод байна. Ерөнхийлөгч Ц.Элбэгдорж бүрэн эрхийнхээ хүрээнд Засгийн газрын гишүүн УИХ-ын гишүүнээр давхар ажиллахгүй байх хуулийн төслийг санаачлан боловсруулсан. Харин дэмжигдэх үгүй нь хаврын чуулганаар шийдэгдэнэ. Учир нь уг хуулийн төслийг УИХ-ын чуулганаар хэлэлцэх үеэр АН-ын бүлэг завсарлага аваад байгаа юм.

Ямартай ч тус хууль батлагдсан тохиолдолд сайд нар эрт эдүгээгийн аль нэг цагт “давхар дээл”-ээ тайлах нь тодорхой болно. Одоо манай Засгийн газрын 18 сайдын 17 нь УИХ-ын гишүүн байгаа. УИХ нь Засгийн газартайгаа ийнхүү холилдсон үед Засгийн газартай хариуцлага яриад байх боломж үнэндээ байхгүй гэж хэлж болно.

УИХ-ын гишүүн нь Засгийн газрын гишүүн байхын сөрөг тал нь мэдээж хариуцлага ярих боломж хомсдоно, парламентын хуралдааны ирц муудна, хуулийн хэрэгжилтэд тавих хяналт суларна, хувь гишүүн сайдад ажил дээр төвлөрч ажиллах боломж багасч, ажил цалгардана. Энэ бүхний үр дүнд нь засаглалын хямрал нүүрлэнэ. Өнөөдөр ч шинж тэмдэг, ул мөр нь тодорч гишүүдийн ирцгүйгээс хурал хойшлох, хангалтгүй ирцээр чуулган, байнгын хороодоо хуралдуулж байгаа жишээ бий.

Мөн "Давхар дээл"-ийг дан болгох бас нэгэн тодорхой шалтгаан байна. Тэр нь мэдээж сайд нарын ирцийн асуудал. Ер нь гишүүд давхар дээлтэй сайд нарыг УИХ, Байнгын хорооны хуралдаанд идэвхгүй оролцдог гэдэг. Үүнийг батлах баримтыг ч мөн дэлгээд байна. 
Эндээс харвал Үйлдвэр хөдөө аж ахуйн сайд Х.Баттулга хамгийн их хурал тасалсан давхар дээлтнээр тодорчээ. Түүний хувьд 37 удаа хуралд суух байсан ч 27-д тасалсан байх юм. Хэдийгээр гадаадад томилолттой гурав, чөлөөтэй нэг гэж бичсэн байгаа ч үлдсэн 23 –т нь ор сураггүй алга болсон гэсэн үг юм.

Хурал тасалсан байдлаараа Х.Баттулга сайдын дараа Хүн амын хөгжил нийгмийн хамгааллын сайд С.Эрдэнэ удаалсан байх юм. Түүний хувьд гадаад, дотоодод томилолттой чөлөөтэй гэх шалтгаанаар 23 удаа хуралд суугаагүй байна.

Гадаад харилцааны сайд Л.Болд гишүүн ч мөн адил 21 удаа хуралд суугаагүй байна. Түүний хувьд хамгийн их гадаадад томилолттой байжээ. Аргагүй юм ГХЯ-ны сайд шүү дээ.

Харин тэдний араас Ерөнхий сайд Н.Алтанхуяг ЗГХЭГ-ын сайд Ч.Сайханбилэг, Ч.Улаан нар 20 болон 13 удаа хуралд суугаагүй гэдэг үзүүлэлтээр тусгай байрт оржээ.

Тэгвэл Ц.Баярсайхан, С.Оюун, Х.Тэмүүжин, М.Сономпил нар хуралдаа хамгийн идэвхтэй суудаг сайдаар тодорсон ч ямар нэгэн шалтгаанаар бас л 3- 8 удаа хурлаа тасалсан байх юм.

Гэтэл УИХ-ын чуулганаар улс орон, ард иргэдийн эрх ашигт хэрэгтэй ямар чухал хуулиудыг хэлэлцсэн билээ. Харин "давхар дээл"-тэй сайдуудаас болж улс орны олон чухал асуудал орхигддогийг ганц энэ жишээнээс харж болж байна. Хоёр ажлыг амжуулж чадахгүй л байгаа юм чинь "давхар дээл"-ээ дан болговол яасан юм бэ сайд нар аа.

Та бүхний хурал тасалдаг байдлыг М.Батчимэг гишүүний хэлснээр ажилдаа түүртдэг гэж зөөллөж болох ч А.Бакей гишүүний хэлсэнчлэн энэ бол ажил ихтэйнх биш цэвэр ёс зүйтэй холбоотой асуудал гэснийг ч санахад илүүдэхгүй биз.