Төрийн орон сууцны корпораци /ТОСК/-иас өнөөдөр мэдээлэл хийлээ.

“Буянт-Ухаа1” хорооллын эхний ээлжний 567 айлын орон сууц ашиглалтад орсон. Тус хороололд орон сууц авах хүсэлтэй иргэдийг ТОСК-ын веб сайтаар дамжуулан бүртгэх бөгөөд ирэх сарын 1-нээс бүртгэлээ эхлэх аж. Иргэд өргөдөл, материалаа өгөхийн тулд ТОСК дээр дугаарлах, урт дараалал үүсгэх шаардлагагүй бөгөөд зөвхөн цахим хэлбэрээр бүртгүүлж, өөрийн нууц дугаарыг авах юм байна.

Төрийн байгууллагууд квотын дагуу дотроо сонгон шалгаруулалтаа явуулснаар ТОСК-ийн цахим хуудаст бүртгүүлж, урьдчилгаа 30 хувь, бусад материалаа өгснөөр байрандаа орох боломжтой аж.

Хэвлэлийн хурлын үеэр ТОСК-ын захирал А.Гантулгаас зарим зүйлийг тодрууллаа.

-Ахмад настай болон хөгжлийн бэрхшээлтэй иргэдийг орлого муу гэсэн үндэслэлээр арилжааны банкууд буцаачих юм биш үү?

-Ахмад настнууд өргөдлөө өгөөд үр хүүхэдтэйгээ хамтраад орон сууцанд хамрах бүрэн боломжтой. Хэрвээ үр хүүхэдгүй тохиолдолд хамаатан садан ойр тойрныхонтойгоо хамт зээлдэгч болох боломжтой. Хөгжлийн бэрхшээлтэй иргэдийн хувьд ч ялгаагүй.

-15 жилийн хугацаа гэдэг бол ахмадуудын хувьд урт хугацаа. Хэрвээ нас барсан тохиолдолд өмчийн асуудлыг хэрхэн зохицуулах вэ?

-Өвлөх эрх нь хамтран зээлдэгч үр хүүхдэд нь үлдэнэ.

-15 жилийн хугацаанд зарж борлуулахгүй гэдэг бол нэг талаараа өрөөсгөл. Хэрвээ боломж бололцоотой болчихоод байраа томруулах орчноо сайжруулах бол яах вэ?

-Үүнийг зохицуулсан заалт журманд орж байгаа. Тухайн үеийн ТОСК-оос барьж буй барилгуудын үнийг харгалзаж үзээд иргэнээс буцаагаад худалдаж авна. Тэгээд орон сууц шаардлагатай байгаа иргэнд нь тухайн хямд үнээр нь олгоно.

-Ирэх сарын нэгнээс захиалга авч эхэлнэ гэж байгаа ч одоогоор ар, өврийн хаалгаар захиалга аваад эхэлсэн гэсэн хардлага иргэдийн дунд байна?

-Өнөөдрийн байдлаар нэг ч байрны захиалга аваагүй байна. Арын хаалгаар байр захиалах боломжгүй.