МАХН-ын батлах гардуулах үйл ажиллагаа шуугиан дагуулсаар байна. Тус намын удирдлагууд өнгөрсөн даваа гарагт Олимпийн хүрэл медальт, гавьяат тамирчин С.Батцэцэгт намынхаа батлахыг гардуулан өгсөн бөгөөд үүнийг нь гавьяат тамирчин өөрийнх нь хүслийг сонсоогүй, огтоос мэдэгдэлгүйгээр шууд тулган өгсөн тухай мэдээлж буй.

Тэгвэл Дорноговь аймгийн МАХН-ын үүрийн дарга тус аймгийн дуучин Б.Чинзоригийг нэгэн арга хэмжээнд урьж дуулуулаад МАХН-ын батлахаа дур мэдэн гардуулсан байна. Дуучин залуу энэ талаар “Олны дунд манай намд авьяаслаг дуучин маань элсч байна. Сүүлийн үед МАХН-ыг сонгох залуусын эгнээ тэлсээр байна гээд тайзан дээр батлах өгчихөөр буцаагаад шидчихэж болдоггүй юм билээ. Ийм байж болохгүй шүү дээ. Би Хувьсгалт намд гомдол мэдүүлж байна. Хүмүүс юу гэж бодох юм. Хүн өөрийн гэсэн үзэл бодолтой, түүнийхээ дагуу л амьдрах ёстой нийгэм биз дээ. Ху намынхан яг л социализмын үед амьдарч байгаа юм шиг ийн загнаж байгаад гомдолтой байна” хэмээжээ.