Долоо хоног бүрийн пүрэв гаригт болдог “Ерөнхий сайдын 30 минут” уулзалт боллоо. Уулзалтын эхэнд Ерөнхий сайд өнгөрсөн долоо хоногт Засгийн газрын хийсэн ажлын талаар танилцууллаа. Тодруулбал, “Бүтээн байгуулалтын цаг уулзалт”-д Хөдөлмөрийн сайд Я.Санжмятав оролцож энэ онд 50-60 мянган ажлын байр бий болгох талаар дэлгэрэнгүй мэдээлэл өгсөн. Ерөнхий боловсролын сургуулиудыг дэлхийн жишигт нийцсэн физик, химийн лабораторийн тоног төхөөрөмжөөр хангаж байна. Хүн амын хөгжил, нийгмийн хамгааллын сайд С.Эрдэнэ “11 11” төвд ажиллаж иргэдийн асуудтад хариулсан. Мөн Шадар сайд Д.Тэрбишдагва Увс, Соёл, спорт, аялал жуулчлалын сайд Ц.Оюунгэрэл Ховд аймагт ажиллана. Эдгээр аймагт худалдааны битүү зах ашиглалтад орж байгаа. Баян-Өлгий аймгийн зах гуравдугаар сард багтаж ашиглалтад орно гэсэн мэдээлллийг Ерөнхий сайд өглөө.


Засгийн газраас зарласан Үйлдвэржилтийг дэмжих төсөл шалгаруулалтад 1151 төсөл ирсэн. Шалгаруулалтын явц ид үргэлжилж байна. Нийт төслийн 776 нь импортыг орлох, 121 нь экспортын төслүүд байна. Засгийн газар шаардлага хангасан төслүүдийг ажил хэрэг болгоход анхаарч дэмжиж ажиллана гэдгийг Ерөнхий сайд өнөөдрийн уулзалтаар хэллээ. Мөн Мөн Монголын эдийн засгийн форумыг ирэх гуравдугаар сарын сүүлчээр “Монголдоо бүтээцгээе” сэдвийн дор зохион байгуулах гэж байгаа гэв.

Энэ үеэр Ерөнхий сайд сэтгүүлчдийн асуусан асуултанд хариуллаа.

- Тагнуулын Ерөнхий газрын дутуу баригдсан барилгыг дуудлага худалдаагаар худалдах гэж байгаа. Үүнээс өөр ямар барилгуудыг дуудлагаар худалдах вэ?

-   Тагнуулын Ерөнхий газрын байрны талаар би тайлбар хийе. Энэ байшинг 13.5 тэрбум төгрөгөөс эхэлж дуудах юм. Энэ байшинг яагаад дуудлага худалдаанд оруулах болсон гэхээр Тагнуулын ерөнхий газрын шинэ барилгын байршил нь буруу, метр квадратын үнэ бага, тоног төхөөрөмж хийх боломжгүй учраас энэ барилгыг дуудлага худалдаанд оруулж байгаа юм. Цаашид их олон барилгыг дуудлага худалдаагаар зарна. Царцаасан төсвийн барилгуудад аудитын шалгалт хийж байгаа. Энэ шалгалт дууссаны дараа аль барилгыг нь дуудлага худалдаагаар борлуулах вэ гэдгийг тодорхойлж, УИХ-аар батлуулна.

-    Төрийн өмчийн хороог татан буулгана гэсэн. Энэ ажил ямар түвшиндээ явж байгаа вэ?

-   Төрийн өмчийн хороог хувьчилна гэхээр хэдэн хүмүүст хувааж өгөх нь гэж ойлгодог. Харин бид бол төрийн өмчийг эзэнжүүлэх гэж байгаа. Зарим алдагдалтай ажилласан жижигхэн газруудыг хувьчилна. Тухайлбал Авто зам засвар, арчлалтын компани гэж байдаг юм. Түүнийг бид орон нутагт нь өгч байгаа. Эзэнтэй болж байна гэсэн үг. Орон нутагт нь зам гүвээ хаагдвал наад газраараа янзлуул гэх мэт. Маш олон аргаар олон газрыг эзэнтэй болгохоор судалж байна. Харин сан болгоно гэж яриагүй байгаа.

- Хөрөнгийн биржийн гүйцэтгэх захирал  ажлаа өгсний дараа элдэв мэдээлэл тархаж байна. Та энэ талаар ямар мэдээлэлтэй байна вэ?

- Сонин хэвлэлээр гарч байгаа мэдээллийг 100 баталгаатай гэж үзэх хэцүү. Төрийн өмчийн хороонд Хөрөнгийн биржид шалгалт оруулаад дүнгээ хэл гэсэн чиглэл өгсөн. Юу нь зөв, юу нь буруу гэдгийг шалгалтын дүнгээр гарах болно.

- Хөдөө орон нутагт ялангуяа баруун аймгуудад шатахууны үнэ 2090 төгрөг болсон гэсэн мэдээлэл иргэдээс ирлээ. Засгийн газрын зүгээс 90 төгрөгөөс илүү нэмбэл шатахуун импортлогч компаниудтай хариуцлага тооцно гэж байгаа. Энэ тал дээр ямар тайлбар хийх вэ?

-   90 төгрөг буюу түүнээс дээш төгрөгөөр нэмэгдэх боломж байхгүй. Хэрэв 90 төгрөгөөс дээш нэмэгдвэл шударга өрсөлдөөний хууль зөрчиж байгаа гэж үзэж, арга хэмжээ авна. 90 төгрөг ч биш 50 төгрөгөөр нэмэгдэх шалтгаан байхгүй. Наадах чинь худлаа мэдээлэл байна. Ер нь бид шатахууны үнээ хангалттай сайн барьсан. Цаашдаа их хэмжээгээр нэмэгдэхгүй.

-   Сургуулиудын барилгын зураг төслийн ажлууд бэлэн болоогүй байна. Нэг маягийн зургууд ч мөн ирээгүй байгаа учраас өмнөх жилүүдийнх шиг барилгын явц удааширч, он дамжих юм биш биз дээ гэсэн бодол байна. Энэ тал дээр ямар тайлбар хийх вэ?

-    Ирэх даваа гаригийн “Бүтээн байгуулалтын цаг”-аар тендерийн явц ямар байгаа талаар дэлгэрэнгүй мэдээлэл өгнө.

-    Энэ жил 16 сумыг “Шинэ сум” төслийн хүрээнд хөгжүүлнэ. Харин нэг сумыг 10 тэрбум төгрөгөөр барихад хөрөнгө санхүү нь хүрэхгүй байна гэж гүйцэтгэгч компанийн зүгээс хэлж байна. Сум хөгжүүлэх төсвийг 15 тэрбум болгож болохгүй юу?

-    Нэг суманд 10 тэрбум төгрөг оногдож байгаа. 10 тэрбум төгрөг дотор л баръя гэсэн. Тэгээд тэр мөнгөндөө тааруулаад юугаа барьж чаддагсан тэрийгээ бариад л зогсох хэрэгтэй. Нэг сумыг 15 тэрбум төгрөгөөр барина гэвэл бид дампуурна. Энэ жилийн 16 сум бол 10 биш нэг нь 5 тэрбумаар босно. Учир нь шинэ сумын төвийн хажууд хуучин сум нь байгаа. Түүнийг яахав гэх мэт олон асуудал гарч ирсэн. Таван тэрбумаас илүү мөнгөөр барих боломжгүй. Яваандаа мөнгөө нэмж болох юм.

-    Иргэн Б.Энхбаяр, Т.Сайнжаргал нар таныг төсвийн хууль зөрчсөн гэх үндэслэлээр  АТГ-д шалгуулсан. Гэтэл тэд таныг өөрсдийг нь цагдаагийн газарт өглөө хэмээн гомдоллож хэвлэлээр мэдээлэл хйиж байна. Энэ асуудлыг хэрхэн шийдэх вэ? 

-  Би хэвлэл мэдээллийнхэнтэй хэрүүл хийгээд байдаггүй. Засгийн газрыг шүүмжилбэл бид хүлээж авдаг. Харин тэд  хэвлэлийн бага хурал хийж байгаад хүний нэр төрд халдсан.  Намайг “Бумбардай” гэдэг номны мөнгө идсэн гэдэг нэрээр гүтгэсэн. Зүгээр андуураад хэлэхийг бол би тоохгүй өнгөрөөнө. Бүр хэвлэлийн бага хурал дээр ярьсан учраас үндэстэй судалгаа, нотолгоотой юм ярьсан байх гэж бодож байна. Тэгээд би “Бумбардай номны мөнгө иднэ гэж юу байхав. Тэр бол эх хэлний эздийн мөнгө учраас надад хамаагүй. Намайг шалгаж өгнө үү" гэсэн хүсэлтийг цагдаагийн газарт гаргасан байгаа. Тэр хэвлэлийн бага хурал хийсэн нөхдүүд намайг мөнгө идсэн гэдгийг нотол гэж байгаа юм. Би ч гэсэн нэр төрөө сэргээлгэж авмаар байна. Энэ нь Н.Алтанхуяг гэх нөхөр хүүхдийн нэр бариад мөнгө идэж, хууль зөрчсөн гэх буруу ойлголтыг хүмүүст төрүүлж байна.

-   АН жигүүр хөдөлгөөн байгуулсан байгаа. Үүнээсээ болоод хагаралтай байгаа гэсэн мэдээлэл байна. Энэ хэр бодитой мэдээлэл вэ?

-  Манай нам үйл ажиллагаагаа хэвийн явуулж байна. Шаардлагатай бол хурлаа хийнэ. Бид жижиг асуудал гэхгүйгээр түүхэн хариуцлагатай цаг үеэ ухаарч ард түмнийхээ төлөө ажиллана гэсэн бодолтой байгаа.