УИХ дахь МАН-ын бүлэг Говь-Алтай аймгийн Засаг даргаар шинээр томилогдсон О.Амгаланбаатар ажилчдаа үндэслэлгүй халж эхэлсэн асуудлаар Ерөнхий сайд Н.Алтанхуягт өчигдөр шаардлага хүргүүлжээ.

Тус шаардлагад "Говь-Алтай аймгийн засаг даргаар саяхан сонгогдож томилогдсон О.Амгаланбаатар нь Монгол Улсын Үндсэн хууль, Монгол Улсын засаг захиргаа, нутаг дэвсгэрийн нэгж, түүний удирдлагын тухай хууль, Монгол Улсын төрийн албаны тухай хуулиудын холбогдох заалтуудыг зөрчин хүний сонгох, сонгогдох эрхийг үл хүндэтгэн  үзэж, нутгийн өөрөө удирдах ёсны байгууллага болох сумын ИТХ-ын хуулиар олгогдсон бүрэн эрхэд бүдүүлгээр халдан шударга ёсыг уландаа гишгэн төрийн албан хаагчдыг үзэл бодол, нам эвслээр нь ялгаварлан гадуурхаж хууль зүйн үндэслэл муутайгаар ажлаас нь халж, чөлөөлж эхэллээ.

Есөн булаг, Дэлгэр, Алтай сумын ИТХ-д МАН-аас нэр дэвшин олонхийн санал авч сонгогдон тухайн үеийн аймгийн Засаг даргын захирамжаар хууль зүйн дагуу томилогдсон Засаг дарга нарыг намын харъяаллаар нь ажлаас чөлөөлж, үүрэг гүйцэтгэгч томилно гэж орон нутгийн ИТХ-ын бүрэн эрхэд халдан ажлыг нь үймүүлж эхэлжээ.

Төрийн албаны тангараг өргөн төрд олон жил тогтвор суурьшилтай ажиллаж мэргэшсэн аймгийн ЗДТГ-ын газар, хэлтэс, албадын дарга нарыг хоморголон халж эхэлсэн байна. Иймд Монгол Улсын хуулийг уландаа гишгэн дураараа авирлаж хүний эвлэлдэн нэгдэх, сонгох, сонгогдох, ажил хөдөлмөр эрхлэх эрхийг нь бүдүүлгээр зөрчин их хэлмэгдүүлэлтийн эхлэл болох халаа сэлгээг эхлүүлж байгаа Говь-Алтай аймгийн Засаг дарга О.Амгаланбаатарын хууль бус үйлдлийг нэн даруй таслан зогсоохыг танаас шаардаж байна" гэжээ.