Чөлөөт бөхийн олимпийн хүрэл медальт, МУГТ С.Батцэцэг өнгөрсөн долоо хоногийн даваа гаригт МАХН-д гишүүнээр элсэн орсон. Хэдийгээр түүнд олны өмнө намын батлахийг нь гардуулж өгөөгүй ч МАХН-ын дарга нар тусгайлан хүлээн авч намынх нь гишүүн болсонд нь баяр хүргэн зураг хөрөгөө даруулсан байдаг.

Гэтэл дээрх үйл явдал болсноос гурав хоногийн дараа МУГТ С.Батцэцэг “Би МАХН-д элсээгүй. Хүнтэй уулзах гэж МАХН-ын төв байранд очих үеэр гэнэтхэн нэрийг маань дуудаад батлах гардуулсан. Надад МАХН болон бусад намд элсэх сонирхол хүсэл байхгүй. Батлахийг нь буцааж өгнө” хэмээн хэвлэлээр мэдэгдсэн юм.

Үүнийг сонссон олон түмэн МАХН-ыг хүчирхийлэгч, нэр хүнд хайгч, хүнийг хүчээр намдаа элсүүлдэг гэх мэтчилэн харааж эхэлсэн бол зарим нь гавьяат тамирчин С.Батцэцэгийг хэнэггүй, тэнэгээр дуудаж гарсан билээ. Гэтэл энэ бүхний цаана ямар нэгэн учир байсан. Тодруулбал, МУГТ С.Батцэцэг хүсэл зорилгоороо МАХН-д элсэж орсон бөгөөд тус намын төв байранд очихдоо л намын батлахаа гардаж авна гэдгээ мэдэж байсан. Бас баяртайгаар батлахаа гардан авчээ. Мөн МАХН-д элсэж буйгаа батлан анкет бөглөж гарын үсгээ ч зурсан байна.

Харин түүнийг Чөлөөт бөхийн холбооны хүндэт ерөнхийлөгч Д.Дагвадорж  дарамтлан МАХН-ын үнэмлэхийг нь буцаалгасан гэж эх сурвалжууд хэлж байгаа. Тэгвэл С.Батцэцэгийг өөрийн хүсэлтээр МАХН-д элссэн гэдгийг нь батлах баримт өнөөдөр олдлоо. Өөрөөр хэлбэл түүний МАХН-д элсэхдээ бөглөсөн анкетийг тус намаас олон нийтэд дэлгэв.

Энэ талаар өнөөдөр МАХН-ын нарийн бичгийн дарга Г.Бямбасүрэн “Манай намд гишүүнээр элссэн, гишүүнчлэлээ сэргээсэн хүмүүст олон дарамт шахалт гарч ирсэн. МУГТ С.Батцэцэгийг хүчээр элсүүлсэн, элсүүлсэн нь худлаа гэх яриа гарсан. С.Батцэцэг болон бусад тамирчдыг батлахаа гардаж авсны дараа Монголын чөлөөт бөхийн удирдах зөвлөлийн хурал болсон байсан. Ингээд С.Батцэцэгийг МАХН-д орсон гэж мэдээд Д.Дагвадорж  дарамталсан. С.Батцэцэгийг мэдэгдэл хийж байгаа нь үүнтэй холбоотой. Мэдээж ийм дарамт ирж байгаа учир тэр хүүхэд айна шүү дээ. Бид баримтгүйгээр ингэж ярихгүй” гэлээ.