Г.Баярсайхан тэргүүтэй Б.Цэрэндорж, М.Ганзориг гэх хүмүүс МАХН-ыг татан буулгах шаардлагатай хэмээн үзэж удаа дараа хэвлэлийн хурал хийсэн. Тэгвэл өнөөдөр МАХН-ын нарийн бичгийн дарга Г.Бямбасүрэн, Ёс зүйн хорооны дарга Г.Давааням нар хэвлэлийн хурал зарлаж зарим баримтуудыг дэлгэлээ.
  
Өнгөрсөн долоо хоногт МАХН-ны төв байранд болсон гишүүнчлэл сэргээх үйл ажиллагааг “хуурамч” болж өнгөрсөн хэмээн хэвлэлээр бичигдсэн. МАХН-ынхны яриад байгаа шиг нэр нөлөө бүхий хүмүүс намын батлахыг гардаж аваагүй  хэмээн үзсэн бөгөөд үүнд нарийн бичгийн дарга Г.Бямбасүрэн  хариулт өглөө. Мөн хэвлэлийн хурлын үеэр МАХН-ыг татан буулгахаар шүүхэд хандаад байгаа Г.Баярсайхан нарын хүмүүсийн талаар МАХН-ын Ёс зүйн хорооны дарга Г.Давааням тайлбар хийсэн юм. Түүний хэлж байгаагаар Г.Баярсайхан нь 2011 оны 3 сараас МАХН-д зүтгэж эхэлсэн бөгөөд 2012 онд Нийслэлийн Мэргэжлийн хяналтын газрын даргаар ажиллахад нь туслалцаа үзүүлсэн байна. Гэтэл хотын дарга Э.Бат-Үүл Г.Баярсайхантай хамтран ажиллахаас татгалзаж байгаагаа удаа дараа мэдэгдсэн учир ажлаас нь чөлөөлжээ. Гэтэл Г.Баярсайхан нь үүнд Шадар сайд Д.Тэрбишдагвыг буруутган, өөрийг нь хамгаалангүй хэмээн тэрсэлдэж эхэлсэн байна. Одоо түүний бариад явж байгаа МАХН-ын гишүүд дэмжигчдийн холбоо“ гээд байгаа байгууллага нь хуучин МАХН гэсэн нэрийг МАН болгон өөрчилөхөд татан буугдсан байгууллага аж. Гэтэл Г.Баярсайхан нь МАХН-ын лого бүхий албан бичиг барьж яваа бөгөөд тамга нь мөн л МАХН, МАН болон өөрчилөхөд хураагдсан тамга юм байна. Тэгэхээр хуурамч тамга бүхий албан бичиг бариад МАХН-ыг татан буулгана хэмээн ярьж яваа ажээ.
Энэ талаар Ёс зүйн хорооны дарга Г.Давааням “Г.Баярсайханы бариад яваа тэр бичгийнх нь тамга нь хураагдсан хуурамч. Хураагдсан тамгыг хуурамчаар ашиглаж хууль зөрчиж байгаа юм. Бид энэ талаар хууль хяналтын байгууллагад хандсан байгаа. Тэр тэр Б.Цэрэндорж гээд байгаа хүн нь нэгэн үе Н.Энхбаярын төлөө үхсэн ч чадна гээд өлсгөлөн зарлаад явж байсан хэрнээ одоо Н.Энхбаяр бол хорт хавдар гээд яриад явж байна. бид Б.Цэрэндоржийн зүтгэлийг үнэлж тухайн үед иж бүрэн гэр, хүүхдийнх нь 2 жилийн сургалтын төлбөрийг төлж байсан. Ер нь эдгээр хүмүүс өөрсдийн ашиг сонирхол нь бүтэлгүйтсэнээс болж ийнхүү хагарал үүсгэж яваа” гэлээ.