УИХ дахь МАН-ын бүлэг өнөөдөр улс орны нийгэм эдийн засгийн өнөөгийн нөхцөл байдлаар мэдээлэл хийлээ. Валютын ханш хяналтаас гарч, Засгийн газар үнийн өсөлтийг хязгаарлах чадамжгүйд хүрсэн гэдгийг УИХ дахь МАН-ын бүлгийн дарга С.Бямбацогт, УИХ-ын гишүүн Л.Энх-Амгалан, Я.Содбаатар нар хэллээ. Өнгөрсөн онд 301 ААН дампуурлаа зарласан. Энэ оны эхний гурван сарын байдлаар 500 компани үйл ажиллагаагаа зогсоох төлөвтэй байна. Олон үйлдвэр аж ахуйн нэгж хаалгаа барьж эхэлсэн нь эдийн засагт улаан гэрэл ассаныг харууллаа гэж УИХ дахь МАН-ын бүлгийн дарга С.Бямбацогт хэллээ. Тиймээс Засгийн газар эдийн засгийн бодит байдлыг ард түмэндээ мэдээлэх ёстой гэв. С.Батболдын засгийн газар ажлаа өгөхөд нэг ам доллар 1305 төгрөгтэй тэнцэж байсан. Гэтэл өнөөдөр нэг ам доллар 1794 төгрөгт хүрч өслөө. Мөн С.Батболдын засгийн газар ажлаа өгөхөд валютын нөөц 4125,8 тэрбумд хүрсэн байсан. Харин өнөөдөр валютын нөөц 2446,3 /самурай бондын мөнгө орсон хэр нь/ болж буурлаа. Сүүлийн долоо хоногийн үзүүлэлтээс харахад нэг ам.доллар өдөрт дундажаар 10 төгрөгөөр нэмэгдэж байна. Эрх баригчид энэ жилийн улсын төсвийг батлахдаа ам.долларын ханшийг 1380 төгрөг байхаар тооцсон. Гэтэл бодит байдалд энэ боломжгүй тооцсон дүн байна гэдгийг харуулж эхэллээ хэмээн тэд ярив. УИХ-аар Монгол Улсын 2014 оны төсвийн хуулийн төслийг хэлэлцэх үед УИХ дахь МАН-ын бүлгээс эдийн засаг хүндэрч болзошгүй байгааг сануулж, ам.долларын ханшийг зөв тусгахаас эхлүүлээд төрийн данхайсан бүтцийг багасгах замаар төр бүсээ чангалах, баялаг бүтээгчдээ дэмжих ёстойг сануулж ирсэн. Даанч эрх баригч хүчин үгийг нь авалгүй хүч түрэмгийлэн төсвийг баталснаар ам.долларын ханшийг 1384 төгрөгтэй тэнцүүлэх амлалт авсан. Харамсалтай нь, төсөв баталсан цагаас валютын ханш тогтмол чангарсаар урьд өмнө хүрч байгаагүй төвшиндөө хүрсэн нь эрх барьж байгаа Ардчилсан намынхны алдаатай бодлого хэрэгжүүлж байгаатай холбоотой гэж УИХ дахь МАН-ын бүлгийн дарга хэллээ.

 Тиймээс УИХ дахь МАН-ын бүлэг Засгийн газарт дараах шаардлагыг хүргүүлсэн байна.

Шаардлагад:

•    УИХ-ын Эдийн засгийн байнгын хороо нээлттэй хэлэлцүүлэг зарлаж, эдийн засгийн нөхцөл байдлаар мэдээлэл сонсох, хүндрэлийг даван гарах арга замыг эрдэмтэн судлаачид, эдийн засагчдаар хэлэлцүүлэх.

•    Засгийн газрын өргөтгөсөн хуралдааныг яаралтай зарлан хуралдуулах.   

•   Засгийн газар эдийн засгийн хямралт байдалд орсноо олон нийтэд нуулгүй зарлаж ард түмэн, сөрөг хүчинтэйгээ хамтран хүндрэлийг давах төлөвлөгөө гаргах.

•   Баялаг бүтээгч бизнес эрхлэгчидээ дэмжиж бодитойгоор ажиллах.