
МАНАН байгуулагдах гэж байгаа талаар ам нээгээд авсан хүн бол яахын аргагүй О.Баасанхүү гишүүн. Тиймээс О.Баасанхүү гишүүнээс МАНАН-гийн талаар зарим зүйлийг асууж тодруулав.
-МАХН засгаас гарч МАН-ынхан МАНАН байгуулна гэж та ярьсан байсан. Энэ талаар тайлбарлахгүй юу?
-Ер нь нэг сонин зүйл байгааг би удаа дараа хэлж байгаа. Юу гэхээр МАХН дотор болсон яриаг МАН мэдчихсэн, МАН дотор болсон зүйлийг манай нам сонсож дуулчихсан байх жишээний. Үүнтэй л адил би МАН-ынхан дотор яригдсан зүйлийг мэдсэн. Түүнийгээ л хэлсэн. Өөрөөр хэлбэл, МАН-ынхны дунд ярисан, АН-аас дэмжсэн МАНАН-гийн талаарх яриаг л би хэлсэн.
-Дөрөвдүгээр сараас МАНАН-гаа байгуулна гэж байсан. Энэ хэр үнэний ортой бол?
-Дөрөвдүгээр сараас долдугаар сарын хооронд МАНАН-гаа байгуулаад бүрэн дуусгана гэж сонссон.
-МАНАН байгуулсанаар таньд сайн, муу ямар ч нөлөөгүй гэж байсан. Чухам ямар учраас ингэж хэлсэн бэ?
- Засгийн газрыг байгуулж байгаа юм бол ажилласан шиг ажиллах хэрэгтэй. МАХН-ыг төлөөлөөд, МАХН нэрийн хөтөлбөрөө гаргаад, зөв бодлогоо тодорхойлоод явах ёстой. Түүнээс биш МАН-ыг ажилтай болгохын тулд МАХН ажиллах ёсгүй. Өөрөөр хэлбэл МАХН-ын нэрээр МАН-ын хүмүүс ажилд орж, ажилтай байгаад байна. Өөрсдөө ажиллаж, хийж чадаад, улс оронд гай болохгүй явж байвал АН, МАН, МАХН-ы хэн ч байсан ажиллах ёстой. Харин гайтай хүмүүс нэг бол нам нам руу гүйж очоод байх юм. Одоо МАХН-ын нэрээр ажилтай болчихсон гэхдээ МАН-ын хүн гэж ярьж байгаа олон хүн байна. Я.Содбаатар, Ж.Энхбаярын хүмүүс гэх мэт.
Харин МАНАН-гийн талаар хэлэхэд, одоо бол МАНАН-г үүсчихсэн байгаа гэж би ойлгож байна. МАХН гэсэн далбаан дор АН, МАН хоёр тохиролцоод бие, биенийхээ булхайг нуугаад л явж байгаа. Тэгэхээр албан ёсоор МАНАН гэж зарлаагүй ч албан бусаар байгаа.
Уг нь энэ МАНАН-гийн асуудал МАН илүү ярих ёстой. Гэтэл тэд нууцлаад байх юм. МАН сүүлийн үед их нууцтай болж. Бага зэрэг хазгай гишгэчихвэл шоронд орох гээд байгаа учир шүү дээ.
Д.Дуулим
Сэтгэгдэл (25)