Тамхины хяналтын тухай хууль хэрэгжиж эхлээд жилийн хугацаа өнгөрч байна. Тиймээс хууль санаачлагч УИХ-ын гишүүн Л.Эрдэнэчимэг, УИХ-ын гишүүн Г.Баярсайхан болон Мэргэжлийн хяналтын ерөнхий газрын албан тушаалтнууд Тамхины хяналтын тухай хуулийн хэрэгжилтийн талаар өнөөдөр мэдээлэл өглөө. УИХ-ын гишүүн Л.Эрдэнэчимэг энэ талаар “Өнгөрсөн нэг жилийн хугацаанд хууль хэрэгжих шатандаа маш олон сайшаалийг болон шүүмжлэлийг дагуулсан. Дотоод орчинд тамхи татахгүй болсноор хоолны газар, баар ресторанд гэр бүлээрээ ая тухтай үйлчлүүлэх нөхцөл бүрдсэн, албан байгууллагуудын дотоод нөхцөл сайжирч, ажил хийх ая тухтай цэвэр орчин бүрдсэн. Олон иргэд хууль батлагдан гарснаас хойш тамхинаас гарсан, ялангуяа хүүхдүүдийн дундах тамхидалт багасаж байгаа, эмэгтэйчүүдийн тамхидалт эрс багасаж байгаа гэсэн сайшаалтай талууд байна” гэлээ.

Сургуулиас 500метр дотор тамхи зарахыг хориглосон заалтын хэрэгжилт муу байна, хууль бусаар тамхи зарах байдал байна, тамхины цэгүүдийг бий болгоогүйгээс хаа сайгүй гудамжинд тамхи татаж байна гэсэн шүүмжлэлүүд их гарсан талаар ч мөн дурдав.

Зарим нэг баар, Ресторанууд дотоод орчиндоо тамхины өрөө нээсэн тохиолдлууд илэрчээ. Энэ нь хуулийн гол заалтыг зөрчиж байгаа том дутагдал гэдгийг онцлоод хууль зөрчсөн байгууллагуудын нэрийг дурдсан юм.

МХЕГ, Нийслэлийн МХГ-аас Тамхины хяналтын тухай хуулийг зөрчиж тамхи татах нөхцлийг бүрдүүлсэн аж, ахуйн нэгж байгууллагуудад мэдээллийн дагуу хяналт, шалгалт хийсэн байна. Шалгалтаар 11 байгууллага нь Тамхины хяналтын тухай хуулийг зөрчин дотоод орчиндоо тамхи татах нөхцлийг бүрдүүлж, тамхи татах өрөөг бий болгосон байжээ. Тиймээс тус газруудад нийт 16 сая төгрөгийн торгуулийн арга хэмжээг ногдуулсан байна. Мөн зөрчлийг арилгуулахаар 40 заалт бүхий 10 шаардлагыг хугацаатай өгчээ. Тус хугацаанд албан шаардлагыг биелүүлээгүй тохиолдолд дараагийн шатны арга хэмжээ буюу тусгай зөвшөөрлийг хүчингүй болгох аж. 2014 онд энэхүү хуулийн хэрэгжилтэнд тавих хяналтыг эрс сайжруулна гэдгийг УИХ-ын гишүүн Л.Эрдэнэчимэг хэлж байлаа. Мөн  Олон нийтийн цагдаагаар дамжуулан хуулийг хэрэгжүүлэхэд анхаарах аж. Ирэх жил маш олон цагдаа нарыг гудамжинд ажиллуулах юм байна. Тус цагдаа нар нь Тамхины хяналтын хуулийн хэрэгжилтэнд анхаарч ажиллан гудамжаар явж шалгалт хийх юм байна. Ингэвэл гадуур ил, задгай тамхи татах нь багасна гэдгийг хууль санаачлагчид хэллээ.