Эрүүл мэндийн сайд Н.Удвал бол МАХН-аас Засгийн газарт ажиллаж буй цөөн хэдэн гишүүний нэг. МАХН-ын дарга Н.Энхбаярын дотны хүн, тус намаас Ерөнхийлөгчийн сонгуульд анхлан нэр дэвшсэн эмэгтэй гээд энэ эмэгтэйн улс төр дэхь байр суурь тэрүүхэн тэндээ том. Сүүлийн үед МАХН-ынхан Засагт багтсан сайд нараа намаасаа “урвалаа”. Намын даалгавар биелүүлсэнгүй хэмээн шүүмжилдэг болсон. Тэгвэл Н.Удвал хатагтай тэр бүх шүүмжлэлд дуугүй өнгөрдөгөө болж одооноос тохирсон хариуг нь барьж байхаар шийдсэн бодолтой.

Тэрбээр өөр рүү нь чиглэсэн шүүмжлэлүүд нь доорх хариултуудыг хэлжээ.

 Намын даалгавар биелүүлсэнгүй гэсэн шүүмжлэлд тэрбээр “Гурван намын гишүүд хамтраад Засгийн газар байгуулаад ажиллаж байхад хэн, хэнийх нь бүх зорилт гүйцэтгэх засаглалын хөтөлбөрт багтах боломжгүй. Аль болох нэг, нэгнийхэ бусдаасаа ялгарах зөв зүйтэй зорилтыг нэгтгэж байж л хөтөлбөрөө боловсруулдаг. Бид энэ л жишгээр ажиллаж байгаа. Цаашид ч ингэж л ажиллана” гэж хариулжээ.

Тэгэхээр тэрбээр цаашид ч Засгийн газрыг тогтвортой байлгахад өөрийн хэмжээнд үүрэг оролцоотой ажиллана гэсэн үг. Харин МАХН-ны бодлого арай өөр байгаа гэдгийг олон нийт мэдэж байгаа.

Мөн тэрбээр сайдуудын “давхар дээл”-ийг заавал тайлах шаардлагагүй гэсэн байр суурийг баримталж байгаа аж. Энэ нь мөн л түүний Засгийн газар, тэр дундаа Ерөнхий сайдынхаа байр суурийг дэмжиж буйн илрэл болов уу. Тэр бүү хэл Ерөнхий сайдыгаа  үнэхээр ажилсаг хүн. Удмын ажилсаг гэх мэтээр хэвлэлээр магтжээ.

Харин түүний энэ бүх үйлдэл намын дарга Н.Энхбаярт нь ямар харагдаж байгаа бол. Магадгүй Н.Энхбаяр ирээд Засагт бужигнаан үүсгэвэл тэрбээр лав хуучин шигээ намын даргынхаа төлөө явах уу, үгүй гэдэг нь үнэхээр сонирхол татаж байна.

Н.Удвал сайдын хувьд Цагаан сарын дараахан намынхаа гишүүдийн хамтаар намын дарга Н.Энхбаяр дээр очиж золгосон. Ингэхдээ намынхаа даргатай тухтай ч уулзаж чадаагүй. Солонгост ганц л хоносон бөгөөд энд ажилтай байсан учраас чөлөө аваад ирсэн хэмээн ярьжээ.

Өмнө нь тэрбээр бүхний түрүүнд намын даргыгаа тавьж, баривчлагдахад нь хүртэл хамт байж уйлан, хайлан хамгаалж байсан. Гэтэл одоо түүнийг тэр үеийнх шиг Н.Энхбаярын төлөө гүйх эсэхэд олон нийт эргэлзэж байна. Учир нь тэр одоо “сайд” шүү дээ. Түүнд намын дарга гэж гүйхийн оронд магадгүй сайдын албан тушаалдаа яаж, ийж байгаад үлдэх нь  хамгийн чухал юм.

 Мөн Н.Удвал хатагтайн дараагийн шүүмжлэлийн байгаар УИХ-ын гишүүн О.Баасанхүү тодроод байна. Тэрбээр О.Баасанхүү гишүүнийг "боловсорч гүйцээгүй боргоцой" гэж дүгнэжээ.

Тодруулбал УИХ-ын гишүүн О.Баасанхүү “Би бол Н.Энхбаяр л гэсэн үг" гэсэн утга бүхий мэдэгдлийг удаа дараа хийсэн билээ. Харин түүнийг ингэж ярьсаных нь төлөө Н.Удвал сайд түүнийг амаа мэдэж ярьж байх хэрэгтэй гэжээ.

Түүнчлэн тэрбээр жижиг хүн хүн ярьдаг. Том хүн сэдэв ярьдаг гэжээ. Үүнээс үзвэл тэрбээр О.Баасанхүү гишүүнийг хүн ярьдаг жижиг хүн, өөрийгөө сэдэв ярьдаг том хүн гэж бодсон бодолтой.