Өнгөрсөн даваа гаригт Сүхбаатар дүүргийн МАН-ын хороо хуралдаж, төлөөлөгчдөө сонгосон. Харин зарим хэвлэл мэдээллийн хэрэгслүүдээр тус хурлыг ихээхэн будлиантай болж өнгөрсөн хэмээн бичиж байгаа. Мөн тус дүүргийн МАН намын хорооны хурлаасаа С.Баяр, Сү.Батболд, Ц.Цогтбаатар зэрэг нөлөө бүхий гишүүдээ бодлогоор шахаж гаргасан гэх мэдээлэл олон нийтийн дунд байгаа. Тэгвэл бид энэ талаар Сүхбаатар дүүргийн МАН-ын хорооны дарга Г.Төмөрбаатараас тодрууллаа.

- Танай хорооны хурал их будлиантай, хэрүүл маргаантай болж  өнгөрсөн гэсэн. Энэ үнэн үү?

- Манай намын хороо хуралдсан. Гэхдээ ямар ч хэрүүл маргаангүй дүрмийнхээ дагуу хуралдсан. Би Сүхбаатар дүүргийн МАН-ын хорооноос бага хуралд зургаан удаа, намын хорооны даргаар тав дахь удаагаа сонгогдож байна. Ингэхдээ би хууль бусаар  ганц ч удаа сонгогдож үзээгүй. Манай гишүүд намайг л даргаара сонгодог.

- Дүүргийн намын хорооны хурлаас намынхаа нөлөө бүхий гишүүд болох С.Баяр, УИХ-ын гишүүн Сү.Батболд, Байгаль орчин, аялал жуулчлалын сайд асан Д.Цогтбаатар нарыг хассан гэсэн. Үүнд та ямар тайлбар хийх вэ?

- Хасаагүй. Хэн хасах юм бэ? Энэ хүмүүс өөрсдөө саналаараа намын хорооны хуралд суудаг. Тэгтэл тэгээгүй. Бас төлөөлөгчөөр нэр нь ч дэвшигдээгүй. Хуралд оролцсон гишүүдийн хэн нь ч дээрх хүмүүсийн нэрийг дэвшүүлээгүй.  Намын  дүрэмд ч  дээрх хүмүүсийг хасна, авна энэ тэр гэсэн заалт байхгүй. Надад энэ хүмүүсийг хасах эрх нь ч байхгүй.  Ер нь бол бидэнд хамаагүй асуудал. Одоо хэвлэлээр гараад байгаа мэдээлэл ор үндэсгүй асуудал. Хэдэн дулдуйдсан нөхдүүдийн хийж байгаа ажил гэж бодож байна.

- Намын хорооны хуралдаа ирж суух үгүй нь өөрсдийн мэдэх асуудал гэсэн үг үү?

- Тийм. Энэ хүмүүс дүүргийн намын хороондоо байх, байхгүй нь тийм чухал биш. Угаасаа намын Бага хурлын гишүүд шүү дээ. Тэгээд ч манай хорооны хуралд байнга ирж суугаад байж чадахгүй хүмүүс. Хэрвээ манай дүүргийн хороонд байнга бүртгэлтэй байна гэвэл хурлаа таслалгүйгээр ирж суухаас гадна энд татвар төлөх ёстой. Байнга тэгэх боломжгүй хүмүүс шүү дээ.