Ерөнхий сайд Н.Алтанхуяг эдийн засаг хүндэрсэн гэдгийг нэг л хүлээн зөвшөөрч чадахгүй байгаа бололтой. Тэрбээр эдийн засгийн өнөөгийн нөхцөл байдлын талаар УИХ дахь намын бүлгүүдэд мэдээлэл хийхээс удаа дараа “бултаж” байгаа бол ард иргэдээс ч мөн адил зугтдаг боллоо.

Ер нь Шинэчлэлийн Засгийн газар эдийн засгийн асуудалд ихээхэн эмзэг хандаж байгаа бололтой. Энэ нь ч тус Засгийн газрынханы асуудал үүсвэл л бултаж, зугтдаг байдлаас нь илт мэдрэгдэж байна. Хамгийн сүүлд Эдийн Засгийн хөгжлийн сайд Н.Батбаяр сэтгүүлчдээс бултсан. Долоо хоног бүрийн даваа гаригт Засгийн газраас зарладаг “Бүтээн байгуулалтын цаг” уулзалтаар эрхэм сайд Н.Батбаяр гуай оролцохдоо Үйлдвэржүүлэлтийг дэмжих хүрээнд иргэд, аж ахуйн нэгжүүдээс ирсэн төслүүдийн талаар товч мэдээлэл хийгээд л гарч одсон. Уг нь сэтгүүлчид түүнээс ам.долларын ханшийн өсөлттэй холбоотойгоор олон зүйл асуухыг хүсэж буйгаа сануулсан ч “Бүтээн байгуулалтын цагаар асуултад хариулдаггүй” гэх тайлбар хийж бултаж орхив.

 Уг нь хариуцсан ажил нь явахгүй байгаа ч  бодит байдлаа үнэнээр нь хэлээд ямар арга хэмжээ авч ажиллах гэж буйгаа танилцууулчихвал Н.Батбаяр сайд өнөөдөр “гоё” харагдах байлаа. Хэдэн сарын өмнө УИХ дахь МАН-ын бүлэг Сангийн сайд Ч.Улаан, Эдийн засгийн хөгжлийн сайд Н.Батбаярыг улсын эдийн засгийг хүнд байдалд оруулсан гэх үндэслэлээр албан тушаалаас нь огцруулах хүсэлтийг гаргаж, УИХ-даар хэлэлцүүлсэн ч Ерөнхий сайд “Манай Шинэчлэлийн Засгийн газрын гол ачаа үүрч яваа сайдууд” хэмээн өмөөрч авч үлдсэн. Тэр бүү хэл дээрх хоёр сайдаа авч үлдэхийн тулд УИХ дахь МАХН-МҮАН-ын “Шударга ёс” эвслийн бүлэгтэй уулзаж, тохиролцсон билээ. Гэтэл арай хийж авч үлдсэн сайд нар нь өнөөдөр улсын эдийн засгийг дээрдүүлэх нь битгий улам л хүндэрүүлэх ажил хийгээд явж байна. Ингэхдээ энэ талаараа ч тодорхой мэдээлэл өгөхгүй зугатаад явж байх жишээтэй.

Ерөнхий сайд Н.Алтанхуяг ч мөн адил сэтгүүлчдэд эдийн засгийн нөхцөл байдлын талаар ямар нэгэн мэдээлэл өгөхөөс шууд татгалзаж байгаа. Мөн тэрбээр Эрдэнэтэд ажиллах үеэрээ иргэд, хөдөлмөрчидтэй уулзалгүй бас л бултсан байх юм.  Уг нь төр засгийн тэргүүнүүд орон нутагт ажиллахдаа заавал иргэд, хөдөлмөрчидтэй уулзаж санаа бодлыг сонсдог ёстой. Гэтэл Н.Алтанхуяг сайд тэднээс бултсан нь мөн л эдийн засгийн нөхцөл байдлын талаар үнэнийг хэлэхээс айсантай холбоотой. Эрдэнэтийнхэн түүнээс асуух асуулт их байсан ч ингэж зугтсанд гомдолтой хоцорсон хэмээн ярьж байна.

Ухаалаг төр, нээлттэй байдал гэж ярьдаг Шинэчлэлийн Засгийн үнэн төрх нь энэ аж. Нээлттэй байдлыг эрхэмлэдэг гэж ярьдаг ч хачир дээрээ тэд бултагч, зугтагч л төдий юм хэмээн иргэд ярьж байна.