Монгол Улсаас Бүгд Найрамдах Албани Улсад суух Онц бөгөөд Бүрэн эрхт Элчин сайд Ш.Одонбаатар энэ сарын 6-нд Бүгд Найрамдах Албани Улсын Ерөнхийлөгч Эрхэмсэг ноён Буяр Нишанид бараалхаж, Итгэмжлэх жуух бичгээ барилаа.

Албани Улсын Ерөнхийлөгч Буяр Нишани Элчин сайд Ш.Одонбаатарыг Итгэмжлэх жуух бичгээ барьсантай нь холбогдуулан хүлээн авч уулзав. Уулзалтын эхэнд Элчин сайд Ш.Одонбаатар Монгол Улсын Ерөнхийлөгч Ц.Элбэгдоржийн мэндчилгээг Ерөнхийлөгч Буяр Нишанид уламжилсны дараа хоёр орны харилцаа, хамтын ажиллагааг хөгжүүлэх асуудлаар ярилцав. Тэрбээр Монгол Улсын нийгэм, эдийн засгийн байдал, хөрөнгө оруулалтын орчин, хэрэгжиж буй төсөл хөтөлбөрүүдийн талаар дэлгэрэнгүй мэдээлэл өгч энэ жил Монгол Улс Бүгд Найрамдах Албани Улстай дипломат харилцаа тогтоосны 65 жилийн ой тохиож байгааг дурдав.

Монгол-Албанийн хооронд худалдаа, эдийн засаг, соёл, боловсрол, шинжлэх ухаан, аялал жуулчлалын салбарт хамтран ажиллах ихээхэн боломж байгаа болохыг Элчин сайд тэмдэглээд хоёр орны харилцаа, хамтын ажиллагааг хөгжүүлэхэд шаардлагатай бүхий л зүйлийг хийнэ гэдгээ мэдэгдлээ.

Албани Улсын Ерөнхийлөгч Буяр Нишани хоёр орны харилцааг хөгжүүлэх онцгой сонирхолтой байгаагаа мэдэгдэж, Элчин сайдын ажлыг бүх талаар дэмжих болно гэдгээ илэрхийлэв.

Элчин сайд Ш.Одонбаатар мөн Бүгд Найрамдах Албани Улсын Парламентын дарга Илир Мета, Гадаад хэргийн дэд сайд Сокол Дервищай, Гадаад хэргийн яамны Америк, Номхон далай, Ази, Африкийн газрын захирал Резар Брегу нартай уулзаж, хоёр орны харилцаа, хамтын ажиллагааг идэвхжүүлэн хөгжүүлэх, Парламент хоорондын хамтын ажиллагааг хөгжүүлэх, Монгол болон Албанийн ГХЯ хооронд хамтран ажиллах тухай санамж бичиг байгуулах, мөн улс төрийн зөвлөлдөх уулзалт зохион байгуулж байх, иргэдийн зорчих нөхцөлийг хөнгөвчлөх хэлэлцээр байгуулах зэрэг асуудлаар тодорхой санал дэвшүүлж ярилцав. Түүнчлэн, хоёр орны хооронд дипломат харилцаа тогтоосны 65 жилийн ойн баярын хүрээнд соёл, урлагийн арга хэмжээ зохион байгуулах талаар ярилцлаа.