Энэ хаврын хамгийн том дуулианаар УИХ-ын царцаасан хэмээх 271 барилгын асуудал тодрох нь гарцаагүй боллоо. Учир нь улсын төсөв мөнгөгүй болоод сүүлийн хэдэн жил он дамжин баригдаж байгаа барилгуудад санхүүжилт өгөхөөс татгалзан төрөөс шалгаж эхэлсэн юм.  Сүүлийн хэдэн жил дамжин баригдсан барилгуудад Үндэсний аудитын газраас гурван сарын хугацаанд 250 сая төгрөг зарцуулан их шалгалт хийсэн. Шалгалтын дүн олон гишүүдийг нойргүй хонуулж эхэлсэн сураг гарлаа. Бас олон бизнес эрхлэгчид, төсөвчид, төрийн албан хаагчид ч сандарч байгаа аж. Тэдний идсэн уусан, тендер будилаантуулсан нь тун удахгүй олон түмний сонорыг мялаахаар болчихоод байгаа юм.

    Он дамжин баригдаж улсаас их хэмжээний мөнгийг жил дараалан авч гаршсан хүмүүсийн анхаарлыг УИХ-ын дарга З.Энхболд татаж байна. Түүний мэдэгдэл олон хүнийг нойргүй хонуулж эхэллээ. Тэрээр “Өмнөх УИХ-ууд тендер зарладаг, хууль зөрчдөг хүмүүс, барилга захиалгын товчооны хууль зөрчигчид, барилга баригдаж байх хооронд сайд нар нь 600 хүүхдийн сургуулийн тоог 900 болгож өөрчилдөг. Тэр мөнгийг нь УИХ асуулгүйгээр баталж өгдөг энэ бүх зүйлээс гажуудал үүссэн. Одоо буруутай хүмүүст бүгдэд нь таарсан арга хэмжээ авах ёстой. Байнга хугацаа хоцроож байсан барилгын компаниуд хар жагсаалтад орж, дахиж ажил авах эрхгүй болох ёстой. Зураг төсвийн магадлан хийж, Ц.Дашдорж, Х.Баттулга сайдын тушаалаар халхавчилж, төсөвт өртгийг 2-3 дахин нэмсэн зураг төсөв зохидог хүмүүс энэ эрхээсээ хасуулж, улс энэ хүмүүст ажил өгөхгүй байх хэрэгтэй. Тендер шалгаруулахад нэг барилгыг гурван компанид хувааж өгсөн тендер будилуулагч бүх хүн төрийн албанаас зайлах ёстой. Одоо тендерүүдийг шинэ зарчмаар явуулна” гэж хэлсэн юм. УИХ-ын даргын хэлсэн үгнээс үзвэл хэд хэдэн зүйл тодорхой болж байна.

Нэгд:  Царцаасан гэх 271 барилгад оролцсон буруутай гэх бүх хүнд төр хариуцлага тооцно.

Хоёрт: Эдгээр 271 барилгыг гүйцэтгэсэн аж ахуйн нэгжүүдээс гадна тендерийг хугацаа хоцруулж гүцэтгэсэн компаниудыг хар жагсаалтанд оруулна. Тэдэнд төр дахиж тендер өгөхгүй.

Гуравт: Барилгуудын төсөвт өртгийг 2-3 дахин нэмэгдүүлж байсан бүх төсөвчдөд хариуцлага хүлээлгэнэ. Тэр хүмүүсийн төсөвчин хэмээх эрх буюу үйл ажиллагаа явуулах зөвшөөрлийг хураана.

Дөрөвт: Барилгын материалын үнийг өсгөх бодлого баримталсан сайд Ц.Дашдорж, Х.Баттулга хоёрт тодорхой хариуцлага ногдуулна.

Тавд: Тендерийг будлиантуулдаг байсан төрийн албан хаагчдыг ажлаас нь хална.

Зургаад: Тендерийг будилантуулсан хүн бүр хуулийн хариуцлага хүлээнэ.

Долоод: Цаашид тендерийг шинэ зарчимаар явуулна гэж ойлгож болохоор байна.

    УИХ-ын дарга З.Энхболд хэлсэндээ хүрч эдгээр бодлогоо баримталж асуудалд хандвал олон хүн дээлээ нөмрөх нь тодорхой боллоо. Энэ бол ирэх хавар ард түмэнд таалагдаж, сөрөг хүчнийхэнийг айлгах сайхан арга байж болох юм. Гэхдээ нэг асуудал байна. Цаашид тендерийг шинэ журамаар явуулна гэж УИХ-ын дарга мэдэгдсэн. Шинэ журам гэдэг нь төрийн ажлыг тендергүйгээр явуулах уу? гэж асуух хүн олон гарах байх. Учир нь Шинэчлэлийн Засгийн газрын үед төрийн олон үйлчилгээг тендергүйгээр шууд гэрээгээр гүйцэтгэсэн тохиолдол гарсан. Тэд ч бас хуулийн өмнө хариуцлага хүлээх ёстой гэсэн гаргалгаагаар асуудалд хандах хүн олон гарах биз. Үнэхээр ч МАН-ынхан тендэрээр, АН-ынхан тендергүйгээр луйварддаг байж болохгүй шүү дээ. Төрийн өмчийг шамшигдуулсан л бол аль нам нь гэлгүй адилхан л хариуцлага хүлээх ёстой.