Эдийн засгийн хөгжлийн яамныхан санхүүгийн Өршөөлийн хуулийн төсөл бичихээр санал авч байгааг эх сурвалж мэдээлэв. Ийм хууль санаачлах нь гадаадад офшор данстай иргэдийн хөрөнгииг эх оронд нь эргэлтэд оруулах, гадагшаа чиглэсэн валютын урсгалыг саармагжуулах зорилготой гэнэ. Ялангуяа, хөрөнгөтэй бийлэгжүү нэг нь гадаадад данс нээлгэж байгаа учраас үүнийг өршөөж, өөрийн хөрөнгөө эх орондоо татах урсгалыг нэмнэ гэж тооцоолж буй юм байна. Үүнээс гадна албан байгууллагуудын татвартай холбоотой багахан хэмжээний зөрчлийг ч энэ хуулиар өршөөх бололтой. Энэ нь татвар төлөхөөс зайлсхийсэн иргэн, албан байгууллагад хамаарахгүй. Дээрээс нь татвар, санхүүгийн маргаантай холбоотой эрүүгийн хэрэг үүнд хамаарахгүй тухай албаны эх сурвалж мэдээллээ.

Хууль зүйн сайд Х.Тэмүүжин энэхүү төслийг санаачилж байгаа гэх шум тархсан ч Хууль зүйн яамныхан энэ мэдээг эрс үгүйсгэж, Эдийн засгийн хөгжлийн яам руу “чулуудчихав”. Тэгэхээр Санхүүгийн өршөөлийн хуулийн төслийг Н.Батбаяр сайд өргөн дэвшүүлэхээр зэхэж байгаа гэсэн үг юм.

Харин үүнийг сонссон зарим иргэд Н.Батбаяр сайд С.Баярцогт гишүүнд өршөөл үзүүлэхийн тулд ийм зүйл санаачилж явна хэмээн ярьж сууна.  Учир нь С.Баярцогт гишүүн Швейцарийн банкинд нэг сая гаруй ам.долларын нууц данстай гэдэг нь өнгөрсөн хавар илэрч шуугиан тарьсан. Түүнийг УИХ-ын гишүүнээс өөрийн сайн дураараа огцрох ёстой гэж үзсэн ч УИХ-ын Ёс зүйн дэд хороо шаардлагагүй гээд өнгөрсөн юм. Эрхэм гишүүний хувьд офшор данс эзэмшихийг хувьдаа дэмждэг нь энэ үүднээс батлагдаж байсан. Харин түүний саналыг Н.Батбаяр сайд ийн ажил хэрэг болгохоор сэтгэл шулуудсан бололтой.

Уг нь офшор дансны тухай ойлголтыг Монголчууд С.Баярцогтоос өмнө төдийлөн мэддэггүй байсан гэхэд болно. Тэгэхээр Санхүүгийн өршөөлийн тухай хууль гарвал хамгийн түрүүнд өршөөгдөх хүн бол яахын аргагүй  С.Баярцогт гишүүн юм.

Манай улс өмнө нь Татварын өршөөлийн хууль гаргаад 15 мянган компанийг 50 гаран тэрбум төгрөгний өршөөлд хамруулж байсан туршлага бий. Гэсэн ч иргэд  ийм хууль гарсаар байтал татвараа нуун дарагдуулж, татвартай холбоотой хэргүүд өдөр алгасахгүй гарсаар өдий хүрсэн. Харин өдгөө Санхүүгийн өршөөлийн хууль баталсанаар үр дүнгээ сайнаар өгөх болов уу гэдэг сонин. Юутай ч хамгийн түрүүнд өршөөгдөх С.Баярцогтод “ээлтэй” Санхүүгийн өршөөлийн хуулийг санаачилж яваа гэх Н.Батбаяр сайд энэ хуулиар өршөөгдөх өөр олон ч эрхмүүдийг танидаг байх нь дамжиггүй. Тиймээс хууль хэрэгжээд эхлэвэл олон арван хөрөнгөтнүүд өршөөгдөх бүрэн бололцоотой болж байгаа юм.