Гадаад харилцааны сайд Л.Болд Бүгд Найрамдах Португал Улсаас Монгол Улсад хавсран суух Онц бөгөөд бүрэн эрхт Элчин сайд Жорж Торрес Пэрэйра Монгол Улсын Ерөнхийлөгч Ц.Элбэгдоржид Итгэмжлэх жуух бичгээ барьсантай нь холбогдуулан хүлээн авч уулзав.

Монгол, Португалын хооронд дипломат харилцаа тогтоосны 40 жилийн ой энэ жил тохиож байгаа бөгөөд энэхүү ойг тохиолдуулан талууд өндөр, дээд хэмжээний айлчлал арга хэмжээ зохион байгуулах, иргэд харилцан зорчих нөхцлийг хөнгөвчлөх чиглэлээр ажиллах нь зүйтэй хэмээн талууд үзэв. Түүнчлэн Монгол, Португалын Гадаад харилцааны яамдын дэргэдэх Дипломат академи хоорондын хамтын ажиллагааг эхлүүлэх, Португал хэлний чиглэлээр хүн сургах боломжийн талаар ярилцав.
 
Мөн  Бельгийн Вант Улсаас Монгол Улсад хавсран суух Онц бөгөөд бүрэн эрхт Элчин сайд Мишэль Малерб Монгол Улсын Ерөнхийлөгч Ц.Элбэгдоржид Итгэмжлэх жуух бичгээ барьсантай нь холбогдуулан хүлээн авч уулзав.

Гадаад харилцааны сайд Л.Болд шинэ тутам Элчин сайд М.Малерб Итгэмжлэх жуух бичгээ барьсанд баяр хүргээд, Монгол, Бельгийн харилцааг идэвхжүүлэх, ялангуяа иргэд хоорондын харилцааг хөнгөвчлөх асуудлаар санал солилцов.

Монгол Улс, Европын Холбооны “Түншлэл, хамтын ажиллагааны хэлэлцээр”–ийг Бельгийн парламентаар соёрхон батлуулах ажлыг түргэвчлэхэд анхаарахыг хүсэв. Элчин сайд М.Малерб Монгол, Бельгийн харилцаа идэвхтэй хөгжиж байгааг тэмдэглэхийн сацуу “Баруун бүсийн оношлогооны төвийг сайжруулах төсөл” Бельгийн Засгийн газрын хөнгөлөлттэй зээлээр хэрэгжснээр хоёр улсын худалдаа, эдийн засгийн харилцааг өргөжүүлэхэд хувь нэмэр оруулна гэдэгт итгэж байгаагаа илэрхийлэв.