Монгол Улсын Гадаад харилцааны сайд Л.Болд Бүгд Найрамдах Индонез Улсаас Монгол Улсад суух Онц бөгөөд Бүрэн эрхт Элчин сайд Соегенг Рахарджог Итгэмжлэх жуух бичгээ барьсантай нь холбогдуулан энэ сарын 14-нд хүлээн авч уулзав.

Гадаад харилцааны сайд Л.Болд Итгэмжлэх жуух бичгээ барьсан Элчин сайд Соегенг Рахарджод баяр хүргээд, хоёр улсын найрсаг харилцааг хөгжүүлэхэд үнэтэй хувь нэмрээ оруулна гэдэгт итгэлтэй байгаагаа илэрхийлэв.

Элчин сайд Соегенг Рахарджо Гадаад харилцааны сайдтай ийнхүү уулзсанд баяртай байгаагаа тэмдэглээд, Монгол, Индонезийн харилцаа хамтын ажиллагааг улам гүнзгийрүүлэн хөгжүүлэхэд идэвхитэй ажиллахаа мэдэгдэв.  

Талууд эдийн засгийн харилцааг гүнзгийрүүлэхэд чухал үүрэгтэй Засгийн газар хоорондын комиссын ажиллагааг идэвхижүүлэх, улмаар хамтын ажиллагааны тэргүүлэх салбар, чиглэлүүдийг тодорхойлох шаардлагатайг онцлоод дурдсан комиссын хуралдааныг Жакарта хотод энэ онд зохион байгуулахаар болов. Мөн хоёр тал Монгол Улсын Ерөнхийлөгчийн Индонез Улсад хийх төрийн айлчлалыг үр дүнтэй болгохын төлөө хамтран ажиллахаар тохиролцов.

Уругвай улсын элчин сайдыг хүлээн авч уулзлаа
Гадаад харилцааны сайд Л.Болд Дорнын Бүгд Найрамдах Уругвай Улсаас Монгол Улсад суух Онц бөгөөд Бүрэн эрхт Элчин сайд хатагтай Мария дел Росарио Портелийг Монгол Улсын Ерөнхийлөгч Ц.Элбэгдоржид Итгэмжлэх жуух бичгээ барьсантай нь холбогдуулан энэ сарын 14-нд хүлээн авч уулзав.

Сайд Л.Болд Элчин сайд М.Портелийг Итгэмжлэх жуух бичгээ барьж, үүрэгт ажилдаа орж байгаад нь баяр хүргээд Монгол, Уругвайн харилцааг хоёр орны эдийн засагт томоохон үүрэг гүйцэтгэдэг хөдөө, аж ахуйн салбарт хөгжүүлэх боломж байгааг тэмдэглэв. Мөн Монгол Улс Уругвайн хөрш Бразил Улсад ЭСЯ-аа нээх гэж байгааг мэдээлж, ингэснээр хоёр орны харилцааг шинэ шатанд гаргах боломж бүрдэнэ гэдэгт итгэж байгаагаа уламжиллаа.

Элчин сайд М.Портел талархал илэрхийлж, Монгол Улс хүн амын тоо, хоёр том хөршийн дунд байрлалтай, хөдөө, аж ахуй өндөр хөгжсөн зэргээрээ  Уругвай Улстай их төстэй байгааг тэмдэглэв. Мөн тэрбээр манай хоёр улс боловсролын салбарт хамтран ажиллах нөөц бололцоо байгааг дурдав.

Уулзалтын төгсгөлд сайд Л.Болд хоёр улсын иргэдийг визгүй зорчуулах тухай хэлэлцээрийн төслийг гардууллаа.