Иргэн Б.Энхбаяр, Т.Сайнжаргал нарын хүмүүс өнгөрсөн оны арваннэгдүгээр сард  Ерөнхий сайд Н.Алтанхуягийг АТГ-т шалгуулах хүсэлт гаргасан. Тодруулбал, Ерөнхий сайдын багц 50 тэрбум төгрөгөөс “Бумбардай” есөн цуврал ном бүтээх ажилд нийт 255 сая 600 мянган төгрөг, “Эх хэлний эзэд” медиа хөтөлбөр хэрэгжүүлэхэд 293 сая 22 мянган төгрөг буюу нийтдээ 500 гаруй сая төгрөгийн зарцуулалт хууль бус байж болзошгүй гэсэн 40 гаруй хуудас материалыг шалгаж өгөхийг АТГ-т тавьсан юм.

Харин АТГ-аас уг хэргийг  гэмт хэргийн бүрэлдэхүүнгүй хэмээн хаасан юм. Улмаар иргэн Б.Энхбаяр, Т.Сайнжаргал нарт хүний нэр төрд халдсан хэмээн эрүүгийн хэрэг үүсгэсэн. Тэгвэл тус хэргийг өнөөдөр прокурорт шилжүүлж байгаа аж.

Үүнд иргэн Т.Сайнжаргал, Б.Энхбаяр нар ихээхэн дургүйцэж байгаагаа илэрхийлээд Ерөнхий сайдын эсрэг заргаа эрчимтэй үргэлжүүлнэ гэлээ. Тэд энэ хэргийн талаар “ Бид Ерөнхий сайдыг гүтгээгүй. Бидэнд эрүүгийн хэрэг үүсгэсэн нь зөрчлийг улам хурцатгаж байна. Баримт нотолгоотой хэргийг хууль хяналтын байгууллагад өгснийхөө төлөө эрүүгийн хэрэгтэн болж байна. Хэнийг ч хардаж шалгуулах эрх нь хуулиар нээлттэй байгаа. Харин хардаж шалгуулсаныхаа дараа эрүүгийн хэрэгтэн болж байгаа нь шудрага бус явдал. Бид уг хэрэгтэй холбогдуулан прокурорт хоёрдугаар сарын 24-д гомдол гаргасан. Гэтэл бидний гаргасан гомдол, хүсэлтийг судалж, хариугаа ирүүлээгүй л байна. Хуулиараа 14, шаардлагатай бол 21 хоногт багтаан прокуророос бичгээр хариу өгөх хуультай. Тэр хугацаа нь ч дууслаа. Н.Алтанхуягийг буруутгасан баримт, нотлох баримтыг хэрэгт хавсаргаж, үнэлэх ажиллагаа хийхгүйгээр зөвхөн нэг талыг барьсан мөрдөн шалгах ажиллагаа хийж буйтай хэрхэвч эвлэрэхгүй, тэмцэх болно" гэлээ.
Харин Ерөнхий сайд Н.Алтанхуяг "Миний нэр төрд халдсан. Санаандгүй миний талаар буруу зүйл ярьсан бол би тоохгүй. Харин хэвлэлийн хурал хийж байгаад миний талаар ярьсан учраас нэр төрөө сэргээлгэнэ. Би "Бумбардай"-н мөнгө идээгүй" гэсэн юм.

Иргэн Т.Сайнжаргал, Б.Энхбаяр нарын гаргасан хүсэлтэд Ерөнхий сайд Н.Алтанхуяг зөвлөх А.Гансүхдээ улсын төсвөөс нийт 14 сая төгрөгийг мөн сайдуудаа 74 сая төгрөгөөр урамшуулсан гэх баримт ч багтаж байгаа аж.