БНКУ-ын гадаад харилцааны яамны Ази номхон далайн орнуудын газрын захирал Мигел Анкел Рамирес өчигдөр Улсын Ерөнхий прокурорын газарт, айлчилж түүнийг Улсын Ерөнхий Прокурорын орлогч, Төрийн Хууль Цаазын Шадар зөвлөх Г.Эрдэнэбат халуун дотноор хүлээн авч уулзлаа.

Тэд уулзалтын хүрээнд БНКУ болон Монгол улсын  хооронд харилцаа тогтож байгаад сэтгэл хангалуун байгаагаа хэлж  энэхүү харилцааны хүрээнд цаашид олон зүйл дээр өөр хоорондоо харилцан туршлага солилцох, хамтран ажиллах боломжийн талаар ярилцаж, санал бодлоо илэрхийллээ.

Улсын Ерөнхий Прокурорын орлогч, Төрийн Хууль Цаазын Шадар зөвлөх Г.Эрдэнэбат хэлсэн үгэндээ: Монгол улсын прокурорын байгууллага шинэтгэлийн хөтөлбөрийг хэрэгжүүлж байгаа бөгөөд энэ ажлын хүрээнд прокурорын байгууллагын хөгжлийг түргэтгэх талаар олон санаачлага гарган ажиллаж байна. Харин бидний энэ ажилд гадны орнуудын сайн туршлага ус, агаар мэт хэрэгтэй байгаа юм. Тиймээс ч бид прокуроруудаа гадны оронд хэлний сургалтанд хамруулах болон туршлага солилцох тал дээр анхаарах нь чухал гэж үзэж байгаа юм гэлээ.

Харин БНКУ-ын гадаад харилцааны яамны Ази номхон далайн орнуудын газрын захирал Мигел Анкел Рамирес хэлсэн үгэндээ:  БНКУ болон Монгол улсын  прокурорын байгууллагын хооронд сайхан харилцаа холбоо тогтож байгаад баяртай байна. Өнгөрсөн хугацаанд Монгол Улсын Ерөнхий Прокурор ноён Д.Дорлигжав БНКУ-д  хийсэн айлчлал маш амжилттай болсон. Энэ айлчлал бидний хоорондын харилцаанд улам бүр шинэ замыг гаргасан явдал боллоо гэж бид үзэж байгаа. Ноён Д.Дорлигжав ирэхдээ манай ерөнхий прокурорыг бас монгол оронд урьсан энэ урилгыг ч баяртай хүлээн авсан удахгүй тааламжтай цагтаа айлчлах байх. Монгол оронд шинэтгэлийн хөтөлбөр хэрэгжиж байгаагийн нэгэн адилаар Куб Улсад ч бас эдийн засгийн загварыг өөрчлөх үйл явц явагдаж байгаа түүнийг дагаад хууль эрх зүйн механизмийг өөрчлөх шаардлага гарч байгаа гэсэн юм.

Уулзалт ярилцлага харилцан ойлголцол, нөхөрсөг байдалд болж өнгөрлөө.