УИХ-ын гишүүн Л.Эрдэнэчимэг, гишүүн Г.Уянга, гишүүн Р.Бурмаа нар УИХ дахь эмэгтэй гишүүдийн албан бус бүлггийг төлөөлөн өнөөдөр /2014.03.18/ эрэгтэйчүүдийн эрүүл мэндийн чиглэлээр төрөөс баримталж буй бодлого, эрэгтэйчүүдийн эрүүл мэндийн байдал, тулгамдаж буй асуудал, хэрэгжүүлж байгаа арга хэмжээ, цаашдын зорилтын талаар Төрийн ордон дахь Иргэний танхимд нээлттэй хэлэлцүүлэг зохион байгууллаа.

  Нээлттэй хэлэлцүүлэгт Эрүүл мэндийн сайд Н.Удвал болон яамны мэргэжилтнүүд, улсын төв эмнэлгүүд, Жендерийн үндэсний хороо, Монголын эрэгтэйчүүдийн холбоо, Батлан хамгаалах яам, хувийн хэвшлийн эмнэлгүүд, Нөхөн үржихүйн эрүүл мэндийн ТББ-уудын сүлжээ, Дэлхийн эрүүл мэндийн байгууллага, НҮБ-ын Хүн амын сангийн төлөөлөл оролцсон байна.

Эрчүүдийн эрүүл мэндийн асуудлаарх сүүлийн үеийн судалгаагаар хамгийн санаа зовоосон асуудал нь эрэгтэйчүүдийн дундаж наслалт бөгөөд энэ үзүүлэлт эмэгтэйчүүдээс даруй 8-9 жилээр бага байна. Эрчүүд эмэгтэйчүүдээс цөөхөн удаа эрүүл мэндийн байгууллагад ханддаг ба осол, гэмтэлд эрчүүд эмэгтэйчүүдээс 2 дахин илүү өртдөг.

Эрчүүдийн эрүүл мэндийн талаарх олон нийтийн үзэл бодол нь бүх нийтээрээ энэ асуудлыг тулгамдсан асуудал гэж үздэггүй, эмч нарын зүгээс чухалд тооцдоггүй, судалгаа мэдээлэл муутай, маш бага төсөв хөрөнгө зарцуулж байгаа ажээ.

Цаашид олон нийт болон эрчүүд өөрсдөө эрүүл мэндийн асуудлаа тулгамдсан асуудал болохыг хүлээн зөвшөөрөх, эрэгтэй эмэгтэй хүмүүсийн эрүүл мэндийг сайжруулахад хөрөнгө төсвийг тэнцвэртэй байдлаар хуваарилах шаардлагатай байгаа талаар хэлэлцүүлэгт оролцогчид асуудал дэвшүүлэн санал бодлоо солилцлоо хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтэс мэдээлэв.