Нэг хэсэг МАН-ын төв байр Тусгаар тогтнолын ордонг төсвийн хөрөнгөөр барьсан учир хураая гэсэн санаачилга гарч өндөрөө авсан. Одоо ч гэсэн энэ яриа намжаагүй бөгөөд улс төрийн бүх намуудыг Тусгаар тогтнолын ордонд оруулах болж өргөжлөө. Магадгүй энэ хаврын халуун өдрүүдэд Улс төрийн намуудын тухай хуультай Тусгаар тогтнолын ордны асуудал яригдах нь гарцаагүй.

    Тэгвэл үүнтэй агаар нэг асуудал цахим ертөнцөд дуулиан тарьж эхэллээ. Энэ бол МҮЭХ, МЗХ-ны байрыг хурааж төрийн мэдэлд шилжүүлье гэсэн санаачилга юм. Учир нь социализмын үед байсан байгууллагуудаас энэ хоёр л өөрсдийн гэсэн байртайгаа үлдсэн аж. Бусдынх нь байрыг хурааж аваад бүтцийг нь задлаад шинэчилсэн. Харин энэ хоёр байгууллага амь бөхтэй тэсч үлдсэн юм. Тэгвэл бусад байгууллагуудтай адилхан байх ёстой гэдэг үүднээс энэ хоёрын байрыг хурааж магадгүй аж.

    Учир нь МҮЭХ, МЗХ-ны байрыг хураах саналыг хэсэг залуус санаачилан төрийн өмчийн хороонд хандаж байгаа гэнэ. Мөн тэдгээр залуус МҮЭХ, МЗХ-ны байрыг хувьчилсан уу? эдгээр байруудтай нь хамт олон нийтийнх болгосон уу? Сүхбаатарын талбайн хажуу дахь МҮЭХ-ны том байр, Спортын ордны ард байх МЗХ-ны байрны өмчлөл хэний нэр дээр байдаг вэ? гэх мэт олон асуудлыг мэдэхээр шуурхайлж эхэлсэн байна.

    Бас МҮЭХ, МЗХ социлизмын үеийн байраа түрээслэн мөнгө олж, бусад төрийн бус байгууллагуудаас илүү давуутай нь шударга бус гэж үзэж байгаа гэнэ. Тиймээс энэ асуудлаар ШӨХТГ-т ч гомдол гаргахаар хуулчидад ханджээ. 

    Ийнхүү МҮЭХ, МЗХ-ны байрны асуудал нэг хэсэгтээ дуулиан тарьж шинэ хэрүүлийн алим бий болгож мэдэхээр байна.

    Мөн АН дахь нилээд олон залуус МЗХ-ны үйл ажиллагааг шүүмжилж социализмын үеийнх нь бүтцээс салгаж байрыг нь хураах ёстой гэсэн байр суурийг баримтлах болжээ. Хэрэв АН-ын нөлөө бүхий залуус энэхүү байр суурин дээрээ байвал МЗХ-ны байр хураагдаж мэдэх юм гэж ажиглагчид дүгнэж эхэлжээ. Тэднийг ийм дүгнэлт хийхэд байраа хураалгах дээрээ тулаад байгаа МАН-ынхны тоглолт ч хувь нэмэр болно гэсэн хандлага нөлөөлөл үзүүлжээ.

    Зарим байгууллагынх нь удирдлага юм л бол тэрний, энэний өмчийг хураая хэмээн орилох болсон нь асуудлыг хүндрүүлэх бас нэгэн шалтгаан болж мэдэх юм. Бусдын өмчийг хураая гэсэн уриалга санаачилга нь өөрийн байгууллагын өмчийг хураалгах сэдлийг ч төрүүлсэн байж мэднэ. Ийнхүү социализмын үеийн бүтцээс тэсч үлдсэн хоёр байгууллагын өмчлөлийн асуудал олон хүний сонирхолыг татахаар болов.