Өнөөдөр МАХН-ын ахмад гишүүд Б.Доржзовд, С.Хорлоо нар хэвлэлийн хурал хийж МАХН-ын удирдлагууд болох Д.Тэрбишдагва, Г.Шийлэгдамба нарыг огцруулах ямар ч үндэслэлгүй талаар мэдээлэл хийлээ.

    МАХН-ын дэргэд “МАХН-ын анхдагчдын холбоо” хэмээн байгуулсан гэгддэг Ч.Азар нарын гишүүд Д.Тэрбишдагва, Г.Шийлэгдамба нарыг огцруулах ёстой хэмээн үзээд байгаа. Тэд МАХН-ын одоогийн удирдлагууд нам дотор шударга бусыг бугшуулж байгаа хэмээн үзэж, хэрэв огцрохгүй бол өлсгөлөн зарлана хэмээн мэдэгдээд байгаа.

 Тэгвэл өнөөдөр болсон хэвлэлийн хурлын үеэр МАХН-ын ахмад гишүүн С.Хорлоо “Бидний хэдэн гишүүд МАХН-ын анхдагчдын холбоог анх байгуулахдаа удирдлагуудынхаа болохгүй хэлж засч залруулж, болж байгааг дэмжиж зөвлөж туслах зорилготой байсан. Гэтэл Ч.Азар нарын хэдэн хүн өнөөдөр зорилгоосоо хазайж бусдын даалгавараар ажиллаж эхлээд байна. Тэд Г.Баярсайхан нарын хүмүүсийн даалгавараар нам дотор хагарал үүсгэх гэж яваа хүмүүс. Ч.Азарын хувьд сонгуулийн сурталчилгаанд оролцсон нэрийдлээр Ерөнхий нарийн бичгийн дарга Г.Шийлэгдамбаас мөнгө нэхэж байгаа. Үнэндээ өөрөө дур мэдэн штаб байгуулж АН-ынхантай нийлж эсрэг сурталчилгаа хийсэн учир мөнгө нэхэх шаардлагагүй. Тэгэхээр тэдний яриад байгаа Д.Тэрбишдагва, Г.Шийлэгдамба нарыг огцруулна гэдэг нь ямар ч үндэслэлгүй, өөрсдийнх нь зохиосон, даалгаварын дагуу хийж байгаа үйлдэл” хэмээн ярилаа.

    Харин МАХН-ын ахмад гишүүд Б.Доржзовд “Би энэ намыг нэрээ авахаас нь эхлээд хамт тэмцэж явсан хүн. МАХН-ын анхдагчдын холбоо гэж байдаг эсэх талаар юу ч мэдэхгүй. Миний хувьд анхнаас нь эхэлж явсан хүний хувьд ийм холбоо байгаа эсэхийг мэдэх л учиртай. Тухайн үед МАХН нэрээ сэргээж авах гэж тэмцэж явахад тэдний хэн ч байгаагүй” гэлээ.