Уламжлал ёсоор “Ерөнхий сайдын 30” минут уулзалт болж өнгөрлөө. Өнөөдрийн уулзалтаар Ерөнхий сайд Н.Алтанхуяг өнгөрсөн долоо хоногт Засгийн газрын хийж гүйцэтгэсэн ажлуудыг танилцууллаа.

Өнгөрсөн долоо хоногт Баян-Өлгий аймаг битүү захтай болсон байна. Ингэснээр бизнес эрхлэгчид болон иргэдэд ая тухтай худалдаа хийх нөхцөл бүрдлээ хэмээн Ерөнхий сайд хэллээ. Баруун гурван аймгийг битүү захтай болгоход 8-9 тэрбум төгрөг зарцуулсан байна. Үүнийг Ерөнхий сайдын багцад байх 50 гаруй тэрбум төгрөгөөс санхүүжүүлжээ. Мөн Өмнөговь аймаг 20 гаруй мянган тээврийн хэрэгслийг үзлэг оношилгоонд хамруулах төвтэй болжээ. Тус төв нь банк, даатгал, тээврийн хэрэгслийн оношилгоо, бүртгэл, зорчигч тээврийн үйлчилгээг нэг дор үзүүлснээр иргэдэд учирдаг төвөг чирэгдлийг багасгах аж.

Засгийн газрын хийсэн бас нэг ажил нь Баян-Өлгийн Ногоон нуур суманд холимог металлын үйлдвэр  ашиглалтад орсон үйл явдал аж. Тус үйлдвэр ашиглалтанд орсноор 700 гаруй хүн шинээр ажлын байртай болох юм байна. Тус үйлдвэр нь цайр, хар тугалга баяжуулж жилд хэд, хэдэн төрлийн металлын 300 тн баяжмал гаргана хэмээн Ерөнхий сайд хэллээ.

Уг уулзалтын үеэр Засгийн газрын хэрэг эрхлэх газрын дарга Ч.Сайханбилэг хил, гаалийн бүтцийн өөрчлөлтийн талаар мэдээлэл өглөө. Хил, гааль дээр шинэ тогтолцоо нэвтрүүлэхээр ажиллаж байгаа аж. Тодруулбал, Монголын хил, гааль дээр гардаг хүнд суртал, чирэгдэлийг багасгаж бүтцээр нь өөрчлөлт хийх юм байна.  Иймээс холбогдох хууль тогтоомжийг шинэчилж байгаа хэмээн Ч.Сайханбилэг сайд хэллээ. Манай улсын хилийн 46 боомтын Алтанбулаг, Замын-Үүдээс бусдад нь зорчигчдод үйлчлэх нөхцөл бүрдээгүй байдаг аж. Мөн хилийн боомтууд хэт олон шат дамжлагатайгаас ачаалал түгжрэл үүсгэх, цаашлаад авлигын уурхай болох шалтгаан болж байгаа хэмээн мэргэжилтнүүд үзэж байгаа. Тэгвэл энэ байдал ирэх сарын 1-нээс өөрчлөгдөх аж. Цаашид хил гаалийн хяналт тавьдаг дөрвөн байгууллагын давхардсан бүртгэл, шалгалт нэг дамжлагад орж, ажилтнууд нь бэлэн мөнгөтэй харьцахаа болих аж. Ингэснээр хил, гаалийн үйлчилгээ бизнес эрхлэгчдэд ээлтэй болно гэв. Өмнө нь замын цагдаа нар жолоочийг зогсоогоод бэлэн мөнгөөр торгодог байсан бол одоо тусгай багажаар бичиг баримтыг нь нягтлаад торгуулийн хуудас бичиж өгдөг болсон. Ингэснээр жолооч нар торгуулийн төлбөрөө банкинд өөрсдийн биеэр аваачиж өгдөг болсон билээ. Яг энэ жишээ шиг хил, гаалийн асуудлыг шийдэх юм байна. Цаашид гааль дээр хүмүүс олон цагаар саатаж, маш их хэмжээний бичиг баримт цуглуулж гаалийн мэргэжилтнүүдэд хахууль өгөх шаардлагагүй болно гэж Ч.Сайханбилэг сайд онцоллоо.