Гадаад харилцааны дэд сайд Д.Ганхуяг манай улсад ажлын айлчлал хийж буй Өмнөд Африкийн Бүгд Найрамдах Улсын Эрдэс баялгийн дэд сайд ноён Г.Олифант тэргүүтэй төлөөлөгчдийг энэ сарын 19-нд ГХЯ-нд хүлээн авч уулзав.Дэд сайд Д.Ганхуяг Өмнөд Африк нь манай улсын Африк тив дэх гол түнш, тухайн бүс нутгийн орнуудтай холбосон гүүр болохыг онцлон тэмдэглээд ӨАБНУ-ын Дэд Ерөнхийлөгч К.Мотлантегийн өнгөрсөн 11 дүгээр сард Монгол Улсад хийсэн айлчлалын үеэр хоёр орны харилцааг өргөжүүлэхээр албан есоор яригдсан зүйл эхнээсээ ийнхүү ажил хэрэг болж, уул уурхайн салбарын хамтын ажиллагаа идэвхжиж буйд талархав. Дэд сайд Г.Олифант уул уурхайн салбар, тухайлбал, нүүрснээс шингэн түлш гаргах чиглэлээр Өмнөд Африкийн дэлхийд танигдсан компани болох “Сасол” манай улстай хамтран ажиллах, туршлагаасаа хуваалцах, хамтын ажиллагааг эхлүүлэхэд бэлэн буйг илэрхийлж, айлчлалын хүрээнд манай холбогдох яамд, төрийн өмчит компаниудын төлөөлөлтэй уулзан хамтын ажиллагааны тодорхой чиглэл, саналыг боловсруулахаар төлөвлөж буй талаараа мэдээлэв.
Ноён Г.Олифантын айлчлалын бүрэлдэхүүнд Өмнөд Африкийн уул уурхай, худалдаа, аж үйлдвэрийн яамд, “Сасол” компанийн төлөөлөгчид багтаж буй бөгөөд 3 дугаар сарын 17-21-нд манай ҮХААЯ, УУЯ, ЭЗХЯ-ны удирдлагатай тус тус уулзаж, Шивээ-Овоо, Оюу Толгойн ордтой танилцах юм.
