МАН-ын Ерөнхий нарийн бичгийн дарга Ж.Мөнхбат энэ өдрүүдэд Орхон, Булган аймгуудад ажиллаж, сонгогчидтай уулзалт хийжээ. Түүнтэй хамт УИХ-ын гишүүн Д.Оюунхорол, УИХ-ын гишүүн Ё.Отгонбаяр, МАН-ын Бага хурлын гишүүн Ц.Цэнгэл нар ажилласан байна. МАН-ын Ерөнхий нарийн бичгийн дарга Ж.Мөнхбат эхлээд Орхон аймгийн Худалдаа үйлчилгээний төвөөр орж худалдаа эрхлэгчидтэй уулзжээ. Энэ үеэр худалдаа эрхлэгчдийн зүгээс иргэдийн худалдан авах чадвар муудаж, бараа бүтээгдэхүүний үнэ өдрөөс өдөрт нэмэгдэж түрээсийн хэдэн төгрөгөө төлж чадахаа байсан тухай ярьжээ. Сүүлийн үед тус захаар үйлчлүүлэх хүмүүсийн тоо ч эрс багасаж байгаа гэв. Үүний дараа  Булган аймгийн ард иргэдтэй уулзалт, ярилцлагыг зохион байгуулжээ. МАН-ын Ерөнхий нарийн бичгийн дарга уулзалтын эхэнд улс орны эдийн засаг, нийгмийн өнөөгийн байдал тулгамдаж буй асуудлын талаар мэдээлэл өгч иргэдийн санал шүүмжлэлийг сонсох үеэр иргэд Засгийн газар, УИХ-ын үйл ажиллагаанд үнэлэлт дүгнэлт өгч буйгаа хэлжээ. Тэд хөөрөг нь томдсон, дээл нь томдсон, албан тушаал нь томдсон, ухаан нь жижигдсэн хүмүүс монголчуудын амьдралаар тоглож, Монгол төрийг зүй бусаар сульдааж байна гэв.