"Монголын эдийн засгийн форум 2014" чуулган эдгээр өдрүүдэд Төрийн ордонд болж байна. Уг чуулганы талаар оролцогчид өөр, өөрсдийн байр суурийг илэрхийлсээр байгаа юм. Тэдний нэг Байгаль орчин, аялал жуулчлалын яамны сайд асан Д.Цогтбаатар тус форумын асуудлаар өөрийн санаа бодлыг илэрхийллээ.

Тэрбээр "Манай Эдийн засгийн чуулганд ирж оролцдог гаднынхан цөөрчээ. Гэтэл зарим нөхдүүд маань "Гаднынхан биднийг залгилаа, гаднынхнаас хэт хараат байна"  гэж номлох юм. Эдийн засгийн хүндрэл удаашрал нь гаднынхны мөнгө хомсдсоноос гэдгийг гүйцэд ухаарахгүй байгаа бололтой. Уг нь валют хэрэгтэй гэж байгаа нь Монгол төгрөг биш тэр гаднынхны мөнгийг л хэлээд байгаа шүү дээ. Гурван хүрэхгүй сая хүнтэй бид гаднынхнаас  нүүрээ мундаг буруулаад үнэд ороод байгаа ч юм шиг. Гэтэл үнэн хэрэгдээ тэр 7 тэрбум чинь биднээс нүүрээ буруулчих гээд байгаа эрсдэл л байна шүү дээ. Би гаднынхны өмнө өвдөг сөхрөх тухай яриагүй. Зүгээр л гаднынхныг урдаа сөхрүүлчих ч юм шиг авирлаад баймааргүй л байгаа юм.

Гаднынхантай санал зөрөлдөх асуудал байж болно. Бусдыг муулахыг урьтал болголгүй ажил хэрэгчээр ярьж шийдвэл болдог л юм даа. За, мэдэхгүй... Хөх тэнгэр мэдтүгэй" гэж хэлэв.