Цахим ертөнцөд Замын-Үүд төслийн удирдагч Б.Батцэндын салбарын сайддаа бичсэн нэгэн “Нялуун” албан бичиг олны гайхширлыг төрүүлж байна. Салбарын сайддаа явуулсан тайлбар бичиг гэх энэхүү албан бичгийг уншсан хүмүүс өөр өөрийн өнцөгөөс дүгнэж сууна. Зарим нь “арай л хэтэрхий долигнож, бялдуучилжээ гэж байхад, нөгөө хэсэг нь үнэхээр боловсролтой, соёлтой залуу байна шүү” гэх мэтээр жиргэх нь ч байна.
          Монгол Улсын Их Хурлын гишүүн, Барилга, хот байгуулалтын сайд Ц.Баярсайханд илгээсэн тус тайлбарт бичигт “Бурхан хүнийг бүтээж бусдыг нь барилгачид бүтээсэн гэдэгчлэн хийсэн бүтээсэн нь нүдэнд харагдаж гарт баригдам сайхан салбарыг манлайлан удирдаж байгаа сайд таны энэ өдрийн амгаланг айлтгахын ялдамд, хоёр улсын Засгийн газар хоорондын хэлэлцээрээр хэрэгжиж байгаа томоохон бүтээн байгуулалтын төслийг амжилттай хэрэгжүүлэхэд байнга тусалж дэмжиж байдагт тань талархал илэрхийлье. Сайд таны хомсхон цагаас хумслан оюуныг тань чилээсэндээ хүлцэл өчсүү. Хүндэтгэсэн Төсөл хэрэгжүүлэх нэгжийн зохицуулагч Б.Батцэнд” гэжээ.