Улс төрийн намуудын дунд сонгуулийн тухай хууль эд маргаан болж байна. УИХ-д суудалгүй намуудыг татан буулгана гэж АН-ын УИХ дахь бүлгийн дарга Д.Эрдэнэбат  тэднийг айлган сүрдүүлж сэрээснээс хойш хэд хэдэн удаа сонгуулийн тухай хуультай холбоотой хэлэлцүүлгийг улстөрийн намууд зохион байгуулаад байна.  Өдрийн сонины асуух эрхийн танхимд улс төрийн намуудын дарга, төлөөлөгчдийг оролцуулсан сонгуулийн хуультай холбоотой хэлэлцүүлэг болсон ч үндсэн сэдвээсээ хазайсан хов, хэрүүл болоод салжээ. Тухайлбал Хамуг Монголын хөдөлмөрийн намын дарга, УИХ-ын гишүүн асан Ц.Шинэбаяр бүх тойрогт манай нам дандаа 70 санал авсан. Сонгууль шударга бус явагдсан. Хэн ялах нь урьдаас тодорхой байдаг сонгуулийн хуультай холбоотой хэлэлцүүлэг худлаа жүжиг байдаг эрх баригчид бүхнийг үгсээд тохирчихдог зэргээр гомдлоо тайлсан байна.

Харин БНН-ын дарга, УИХ-ын гишүүн, ҮХЯ-ны сайд асан Б.Жаргалсайхан “Би МАН-ыг эсэргүүцэгч, МАН бол заврхал хоцрогдол. Би АН-ыг Монголын ирээдүй гэж харж байсан. Гэтэл биш юм байна. МАН-тай ойрхон  олон жил далчигнасан учраас ялзарсан байна” гэж тодорхойлов. Ер нь УИХ-д суудалгүй улс төрийн  намын дарга нар сонгуулийн саналыг хуудсыг гараар тоолох хэрэгтэй гэсэн байр суурийг түлхүү баримталж байсан бол ИЗН-ын улс төрийн зөвлөлийн гишүүн, Г.Ганхүү “хар машиныг жигших хэрэггүй, технологийн давуу талыг ашиглах ёстой” гэсэн байр суурьтай байжээ. Харин үүнд эгдүүцсэн Б.Жаргалсайхан “Манай Г.Ганхүү сая ярьж байна, АН-ын ярьсныг сайн давтаж байна. Яагаад гэвэл АН Оюунд хоёр суудал өгчихсөн байхгүй юу, Оюун хэзээ ч сонгуулиар гардаггүй. Эрх барьж байгаа намуудтай тохирчихдог. Намайг гаргаарай, тэгвэл Ерөнхийлөгчийн сонгуулиар дэмжинэ шүү гээд ахыгаа яриад уйлчихдаг” гэжээ.  Мөн түүнчлэн тэрээр МАН, МАХН хоёрыг үндсэн хуулиар хориглох хэрэгтэй гэсэн саналыг хэлэв. Үүнд эгдүүцсэн Х.Оюунхорол гишүүн “Хөөе найз. Чи өнөөдөр эрх баригчдад жаахан зусардаж байгаа юм байна” гэж бухимдсан бол Б.Жаргалсайхан ийм бодолтой 24 жил явж байгаагаа илэрхийлэв. Ингэж явахдаа чухам яагаад 2006 онд М.Энхболдын засгийн газарт сайд болж, 2007 онд С.Баярыг Ерөнхий сайд болоход нь “их сайн хүн” гэж магтаж, 2009 оны Ерөнхийлөгчийн сонгуульд Н.Энхбаярыг шүгэлдэн дэмжиж явсныг нь харин хэн ч асуусангүй.

Түүний үзэж байгаагаар өнгөрсөн хугацаанд шударга сонгууль огт болж байгаагүй. Эрх баригчид үргэлж үндсэн хуулийн бус арга замаар засгийн эрхийг гартаа оруулж байсан болж байна. Ингэхдээ С.Оюуныг үргэлж сугандаа хавчуулж гаргаж ирдэг байсан гэсэн санааг хэлэв. Хэрэв түүний хэлсэн үнэн бол Б.Жаргалсайхан үргэлж ард түмний дэмжлэгийг авдаг, харин С.Оюун үргэлж дээрээсээ татуулж гардаг болж таарах нь. Нэгэн цагт ИЗБНН болтолоо нэгдэн, шадарлаж явсан энэ хоёр эрхмийн дунд чухам юунаас үүдэлтэй хагарал болсныг хүмүүс тэр бүр мэддэггүй. Ямартай ч эмэгтэй хүн янз янзын зүйл яриагүй байхад эр хүн байж ийм атаархуу, хорзон үг унагалаа гэж зарим нэг нь түүнийг шүүмжилж байна.