Өнөөдрийн хуваарийн дагуу “Ерөнхий сайдын 30 минут” уулзалт боллоо. Тус уулзалтаар Ерөнхий сайд Н.Алтанхуяг Засгийн газрын өнгөрсөн долоо хоногт хийсэн ажлууд болон ирэх хоёр сард хийхээр төлөвлөж буй ажлуудынхаа талаар танилцууллаа.

Чингис бондын үлдэгдлийг экспортыг дэмжих, импортыг орлох үйлдвэрт зарцуулахаар төлөвлөсний дагуу Засгийн газраас төсал шалгаруулах уралдаан явуулсан. Уралдааны дүн өнгөрсөн сард гарч 800 гаруй төсөл шалгараад байгаа юм. Ерөнхий сайд ирэх долоо хоногт үлдсэн төслүүдтэй танилцаж дуусаад арилжааны банкууд руу явуулах аж. Харин арилжааны банкууд хэрэгжүүлэх боломжтой төслүүдийг ялгаад хөгжлийн банк руу явуулах юм байна. Эцсийн байдлаар хөгжлийн банк шалгаж үзээд хөрөнгө оруулалтыг нь өгөхөөр болжээ.

Мөн өнгөрсөн өдрүүдэд Монголын эдийн засгийн форум болж өнгөрсөн. Уг чуулганыг Ерөнхий сайд амжилттай болсон гэж дүгнээд “Монголдоо үйлдвэрлэе” уриаг ажил хэрэг болгох тал дээр чадлаараа ажиллах болно гэж хэлэв. Өмнөх жил ноос ноолуурын салбартаа хөрөнгө оруулж, хүлэмжтэй болж, оёдол эсэргүүчдээ дэмжье гэсэн зорилтыг тавьсан. Үүнийгээ ч биелүүлж чадсан гэж Ерөнхий сайд онцлов. Тухайлбал Чингис бондоос өнгөрсөн жил ноос, ноолуурт мөнгө зарцуулж тус салбарыг өргөтгөсөн байна. Мөн аялал жуулчлалаа хөгжүүлэх ажлыг хийж эхэлсэн бөгөөд 2015 онд Герман улсад болох олон улсын аялал жуулчлалын үзэсгэлэнд Монгол орон гол түнш орноор оролцохоор болсон байна. Ингэснээрээ монголчууд гадны анхаарлыг татаж чадах боломжтой болж байгаа гэв.

Харин энэ жил Монголдоо үйлдвэрлэж болох ажлуудаа тодорхой болгосон байна. Тухайлбал 2015 он гэхэд цементийн гурван том үйлдвэрийг дотооддоо босгох ажлыг эхлүүлжээ. Хөтөлийн цементийн үйлдвэрт л гэхэд л мөнгө зарцуулж бүрэн хүчин чадлаар нь ажиллуулахаар болсон байна. Ингэснээр тус үйлдвэр 100 сая тонн цемент үйлдвэрлэх аж. Ерөнхий сайд утааг огт мартаагүй байгаа гэдгээ өнөөдөр хэллээ. Өмнө нь тэрбээр долоо хоногт дөрвөн удаа утааны асуудлаар хуралддаг байсан бол одоо хоёр удаа ярьдаг болсон байна. Мөн хагас коксжсон түлшний үйлдвэр барих асуудлаар холбогдох хүмүүстэй ярилцаж байгаа аж. Харин коксжсон нүүрс нь утаа гаргадаггүй ч асах чадвар нь муу байдаг учраас  асаалтыг нь сайжруулахын тулд асаах төхөөрөмжийн уралдаан зарлажээ.

 Мөн ирэх сард наадмын бэлтгэлийн асуудлаар холбогдох албаныхантай уулзахаар болжээ. Энэ жил Хүй долоон худагт бүтээн байгуулалтын хэд, хэдэн ажлыг нэмж хийхээр болсон байна. Тухайлбал, сандал нэмж тавихаас гадна зам тавьж тусгай машинаар үйлчилдэг болно гэлээ. Энэ жилдээ бөхөө төв цэнгэлдэх хүрээлэндээ барилдуулаад морио Хүй долоон худагтаа уралдуулна гэж Ерөнхий сайд хэлэв. Харин ирэх жилээс наадмын үйл ажиллагаагаа цогцоор нь Хүй долоон худагт зохион байгуулах юм байна. Ингэхийн тулд бүтээн байгуулалт, тохижилтын олон ажлыг Нийслэлтэй хамтарч хийх юм байна. Мөн энэ жилдээ багтааж Туулын хурдны замыг ашиглалтанд оруулах юм байна. Бас уулын аялалын маршрутыг ирэх сард гараж Богд ууланд шинэ зам гаргахаар болсон байна.