Цуврал 2.

    УИХ-ын ээлжит чуулган ирэх 7 хоногийн сүүлээр эхлэх хувиартай. Чуулганы хамгийн түрүүнд хэлэлцэх асуудал нь давхар дээлтэй сайдуудыг дан болгох тухай хуулийн төсөл юм. Уг хууль батлагдвал УИХ, Засгийн газрын гишүүний ажлыг хавсран хийж байгаа 17 сайдын олонхи нь огцрох аюултай тулгарна.

    Нөхцөл байдал ингэж эргэсэн учир намрын чуулганаас АН-ынхан завсарлага аваад одоо хүртэл үргэлжилж байгаа. Тиймээс хуулийн дагуу энэ асуудлыг хамгийн түрүүнд хэлэлцэнэ.

    Энэ хууль дэмжигдэх маш их магадлалтай болжээ. Мэдээж сөрөг хүчний 26 гишүүн гар өргөнө. Дээр нь ерөнхийлөгчийг дэмждэг гишүүд санаачилгыг зөв гэж үзнэ. Бас эдийн засгийн хүндрэлээс болоод засгийг муу ажиллаж байна гэж үздэг, бас сайд болчих мөрөөдөлтэй гишүүд гараа өргөнө гэж эрх баригчид тооцоолсон сураг гарав. Ингээд байдал эвгүйтсэн учир Ерөнхийлөгчөөс аврал эржээ.

    Засгийн газрын тэргүүн Н.Алтанхуяг МУ-ын Ерөнхийлөгч Ц.Элбэгдоржтэй хэд хэдэн удаа уулзаж “ахаа намайг авараарай” гэдэг шиг юм болжээ. Учир нь Ерөнхий сайд Н.Алтанхуяг Ерөнхийлөгчтэй уулзахдаа давхар дээлийг дан болгох хуулийн төслөө татаж авахыг нэг бус удаа хүссэн гэж эх сурвалж мэдээллээ. Гэвч Ерөнхийлөгч Ц.Элбэгдорж энэ асуудал улс эх орны эрх ашигтай холбоотой гээд халгаагаагүй аж. Тэгэхээр нь Н.Алтанхуяг Засгийн газрын гишүүдээ Ерөнхийлөгчтэй уулзаж хуулийн төслийг татан авахуулахаар ээлж дараалан илгээжээ. Тэр бүгдэд нь Ерөнхийлөгч “за” гэж хэлсэнгүй. Ийм утгатай хэлцэл Ерөнхийлөгч, Ерөнхий сайд нарын зөвлөхүүд, ЕТГ-ын дарга, ЗГХЭГ-ын дарга нарын хооронд ч чуулган завсарласан үед албан ба албан бусаар өрнөсөөр байж. Гэвч тусыг эс олжээ.

    Асуудал ингэж өргөн хүрээнд өрнөж байх зуур Ерөнхийлөгч Япон явж нурууны хагалгаанд орох тухай мэдээлэл гарсан нь Засгийн газрын сайд нарыг бажигдуулжээ. Тэд хэлэлцээ, ойлголцлоо түргэтгэхийг хичээсээр байж. Гэвч нэг л өдөр Ерөнхийлөгч хэвлэлээр гарсан мэдээллийн дагуу Японыг зорьжээ.

    Ерөнхийлөгч энэ үйлдлээрээ давхар дээлтэй сайд нарыг дэмжихгүй гэдэгээ илэрхийлж байна. Бас асуудлыг хэлэлцэх үед Монголд байхгүйгээ ажлын албаныхандаа дуулгаж. Өөрөөр хэлбэл асуудлыг хэлэлцэж дууссаны дараа л ирнэ гэжээ. Энэ үйлддээрээ “намайг байхгүй хойгуур учраа ололц. Би асуудалд оролцохгүй” гэж хэлсэн бололтой.

    Ингээд Ерөнхийлөгч давхар дээлийг дан болгох хуулийн төслөө татаж авалгүй гүрийсээр Японыг зорьжээ. Засгийн газрын гишүүдийн хүсэлт талаар болсон тул айдаст автсан сайд нар гишүүдтэй тулж ажиллах гарц дээр бооцоо тавьсан гэж эх сурвалж мэдээллээ.

    Ийнхүү Засгийн газрын хувь заяа дээсэн дөрөөн дээр дэнжигнэж байна. Ядаж байхад Ерөнхийлөгч үйлдлээрээ дэмжихгүй гэдэгээ ойлгуулж. Бас эдийн засаг хүндрээд ард түмний амьдрал дордоод байдаг. Сайд нар дотроосоо бие биеэ “балбаад” эхэлж. Энэ мэт олон талын хүчин зүйл Засгийн газрын гишүүдийг нойргүй хонуулах боллоо.