УИХ-ын Тамгын газар, Швейцарын Хөгжлийн агентлаг, НҮБ-ын Хөгжлийн хөтөлбөр хамтран хэрэгжүүлж байгаа “Нутгийн өөрөө удирдах байгууллагын чадавхийг бэхжүүлэх нь” төслийн хүрээнд Багахангай дүүргийн Иргэдийн төлөөлөгчдийн хурлын төлөөлөгчдийг чадавхижуулах сургалт өнөөдөр /2014.03.28 / эхэллээ. 2013 оны 6 дугаар сараас эхлэн хэрэгжиж эхэлсэн УИХ-ын Тамгын газар, Швейцарын Хөгжлийн агентлаг, НҮБ-ын Хөгжлийн хөтөлбөрийн хамтарсан “Нутгийн өөрөө удирдах байгууллагын чадавхийг бэхжүүлэх нь” төсөл нь нутгийн удирдлагын хариуцлага, орон нутгийн үйлчилгээг сайжруулах, орон нутгийн хурлын төлөөллийн болон хяналтын чиг үүргээ хэрэгжүүлэх чадавхийг бэхжүүлэх, Төлөөлөгчдөд зориулсан үндэсний сургалтын хөтөлбөрийг боловсруулж, түүнийг хэрэгжүүлэх механизмыг бий болгох, иргэдийн оролцоог хангаж байгаа сайн туршлагыг дэлгэрүүлэх, нутгийн өөрөө удирдах байгууллагын эрх зүйн орчныг сайжруулах зэрэг цогц арга хэмжээг хэрэгжүүлэхээр ажиллаж байна.
ИТХ-аас төлөөлөгчдийг чадавхижуулах сургалтанд ямар сэдэв, агуулгатай байх тухай хэрэгцээний санал асуулга авахад Нутгийн өөрөө удирдах байгууллагын Үндсэн хуулийн ба эрх зүйн үндэс, иргэдийн оролцоо, иргэдтэй харилцах, ИТХ-ын хуралдааныг зохион байгуулах, орон нутгийн төсөв, санхүүгийн удирдлага, авлигаас урьдчилан сэргийлэх, байгаль орчин - ногоон хөгжил, хүний эрх ба жендэр гэсэн 7 сэдвийг төлөөлөгчид үүрэг, хариуцлагаа дээшлүүлж ажиллахад нэн чухал хэрэгцээтэй хэмээн үзсэн.

Энэхүү хэрэгцээн дээр суурилан Удирдлагын Академи, МУИС, Хүний эрхийн комисс, Авилгалтай тэмцэх газартай хамтран төлөөлөгчдөд зориулсан үндэсний сургалтын хөтөлбөр, гарын авлагыг боловсруулан, сургагч багш нарыг бэлтгэж, 2013 онд Хэнтий, Өмнөговь, Төв, Баянхонгор, Баян-Өлгий аймаг, Сонгино-Хайрхан, Сүхбаатар, Баянзүрх дүүргийн 2100 төлөөлөгчдийг чадавхижуулах сургалтанд хамруулсан бол 2014 онд Булган, Дорнод, Дундговь, Говьсүмбэр, Говь-Алтай, Өвөрхангай, Завхан, Дархан-Уул, Ховд, Хөвсгөл, Орхон, Сэлэнгэ аймаг, Налайх, Багануур, Хан-Уул, Баянгол, Чингэлтэй дүүргийн нийт төлөөлөгчид сургалтанд хамрагдсан.
Өнөөдөр  Нийслэлийн Багахангай дүүргийн ИТХ-ын 17 төлөөлөгч,  ажлын албаны ажилтнууд Тэрэлж дэх Улаанбаатар II цогцолборт энэхүү сургалтад хамрагдаж байна. Сургалт хоёр өдрийн турш үргэлжилнэ хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.