УИХ-ын дарга З.Энхболд өнөөдөр Өвөрхангай аймгийн “Хөгжимт драмын театр”-т иргэдтэй уулзалт хийв.

Өвөрхангай аймгийн иргэдтэй хийх уулзалтыг нээж, аймгийн Иргэдийн Төлөөлөгчдийн Хурлын дарга Г.Ганболд үг хэллээ. Тэрээр УИХ-ын дарга болон гишүүд аймагт биечлэн ирж, ажил байдалтай танилцан, иргэдийн санал, сэтгэгдлийг сонсож байгаад талархаж буйгаа илэрхийлэв. Өвөрхангай аймаг нь засаг захиргаа, нутаг дэвсгэрийн нэгжийн хувьд 19 сум, 107 багтай, 32.0 мянган өрх, 110.5 мянган хүн амтай, хөдөө аж ахуй, түүний дотор мал аж ахуй зонхилсон эдийн засагтай аймаг юм. Өвөрхангай аймагт 2014 онд улсын төсөв, хөрөнгө оруулалтаар нийт 15.4 тэрбум төгрөгийн санхүүжилт бүхий найман ажил хийгдэнэ. Үүнээс 10.4 тэрбум төгрөгийн төсөвт өртөг бүхий таван ажил орон нутагт, 2 тэрбум төгрөгийн төсөвт өртөг бүхий хоёр ажил худалдан авах ажиллагааны мэргэжлийн байгууллага дээр тус тус зохион байгуулагдах юм байна. Арвайхээр суманд шинээр баригдах дулааны станц, дулааны шугам барих ажил, төр, хувийн хэвшлийн түншлэлийн хүрээнд гэрээний дагуу хийгдэхээр болжээ.
Уулзалтын эхэнд УИХ-ын дарга З.Энхболд Арвайхээрийн агаарын бохирдлын асуудлыг онцлов. Энэ оны аравдугаар сард Арвайхээрийн 12 зуухны асуудлыг шийдвэрлэж, дулааны төвлөрсөн уурын зуухтай болох ажил эхлэх талаар мэдэгдэв. УИХ-ын дарга Өвөрхангай аймгийн иргэдэд хууль тогтоох үйл ажиллагаа, бодлогын шинэчлэл, түүний үр дүнгийн талаар тайлагналаа. Улсын Их Хурал 2013 оны намрын ээлжит чуулганы хугацаанд нийт 100 хууль, 52 тогтоол баталсан бөгөөд үүнээс бие даасан хууль 12, нэмэлт өөрчлөлт оруулах тухай хууль 81, Зээлийн хэлэлцээр соёрхон батлах тухай 1, УИХ-ын тогтоол 52 байсан байна. Мөн ээлжит намрын чуулганы хугацаанд батлагдсан “Хөрөнгө оруулалтын тухай”, “Хөрөнгө оруулалтын сангийн тухай”, “2014 оны төсвийн тухай”, “Хилийн боомтын тухай” зэрэг хуулиудын талаар танилцуулсан юм. Түүнчлэн 2014 онд Улсын төсвөөр хэрэгжүүлэх нийт хөрөнгө оруулалтаар хийгдэх ажлуудын талаарх мэдээллийг өгөв. Тухайлбал 2014 онд нийт 69 цэцэрлэг, 49 сургууль, 28 дотуур байр, 30 эмнэлэг, 27 соёлын төв, 683,1 км хатуу хучилттай зам, 5 цэвэрлэх байгууламж, 1032 у/м төмөр, бетон гүүр тус тус ашиглалтанд оруулахаар төлөвлөжээ. Түүнчлэн УИХ-ын дарга 2014 оны 3 дугаар сарын 28-ны өдрийн байдлаар найман хувийн хүүтэй орон сууцны зээлийн үлдэгдэл 2.1 их наяд төгрөг байгаагаас Улаанбаатарт 1.6 их наяд , орон нутагт 477.1 тэрбум төгрөг, үүнээс Өвөрхангайд 27.2 тэрбум төгрөгийн зээл олгогдсон байгааг хэллээ. Улсын хэмжээнд орон сууцны найман хувийн ипотекийн зээлд хамрагдсан 17.241 иргэн 487,6 тэрбум төгрөгийн зээл аваад байна.
Хөдөө орон нутгийн хувьд, эрчимжсэн мал аж ахуйг хөгжүүлэх чиглэлээр малын тоо толгой байнгын өсөлттэй байгаа бөгөөд төр, засгаас гаргах төсвийн хэмжээ ч нэмэгдсэн байна. Өвөрхангай аймгийн хувьд, “Альпин” үйлдвэрийн Франц ямааг нутагшуулан амжилттай үржүүлж байна. “Альпин ” үйлдвэрийн ямааны ферм сүүний чиглэлийн ямааг 2013 оны 06 дугаар сарын 10-нд Франц улсаас 202 ширхэгийг туршилтаар авчирсан. Өнөөдрийн байдлаар хээлтүүлэг 80 хувьтай байгаа талаар “Альпин” ямааны фермерийн эзэн Ж.Даваасүрэн хэлж байв. “Альпин” ямааны хувьд, зун намартаа бэлчээрт гарч, өвөл хавартаа дулаан байранд арчилгаа шаарддаг онцлогтой бөгөөд ямааны ашиг шимийн хувьд нэг удаад 3-5 литр сүү өгдөг байна. Мөн УИХ-ын дарга З.Энхболдын санаачилгаар Өвөрхангай аймгийн 19 суманд хэрэгжиж байгаа “Мал сүргийн ашиг шим, удмын чанарыг сайжруулах” инновацийн төслийн хүрээнд 2011 онд 272 барга үүлдрийн хуц, шилмэл 50 сарлагын бухтай үржүүлгийн ажил эхэлж дараагийн жилүүдэд Дорнодын шилмэл 28 бух, 842 барга хуцаар сүрэг сэлбэж, 2014 оны байдлаар төслийн хүрээнд 2100 хуц малчдад нийлүүлжээ. Мөн 4 жилийн нийлбэрээр 467 мянган хонийг сайжруулсан статистик дүн гарсан байна. Хөдөө орон нутгийн өмнө тулгамдсан асуудлын нэг бол ноолуурын асуудал байдаг. УИХ-аас ноолуурын үйлдвэрлэлийг дэмжих, экспортыг нэмэгдүүлэх /НҮДЭН/ арга хэмжээг авч хэрэгжүүлэх гэж байна. Үүний хүрээнд монголын ноолуурын үйлдвэрүүд 2014 онд 4000 тонн түүхий эд боловсруулан экспортод гаргаснаар манай улсад 250-300 сая ам.долларын нэмүү өртөг бий болох юм. Ингэсний үр дүнд ойрын хоёроос гурван жилд ноолуурын үйлдвэрүүд 6000-7000 тонн түүхий эд боловсруулан экспортлох боломжтой гэж үзэж буйг хууль тогтоох дээд байгууллагын тэргүүн уламжлав. Мөн УИХ-ын дарга бизнесийг хөгжүүлэх кластерийн асуудлыг хөндөв. Монгол Улсын хувьд, нэгдүгээрт, ноолуурын кластер, хоёрдугаарт, арьс ширний кластер, гуравдугаарт, Сайншандын аж үйлдвэрийн цогцолборын кластерыг хөгжүүлэх боломжтой болохыг мэдэгдэв.

Иргэдийн зүгээс УИХ-ын даргаас УИХ-ын ээлжит хаврын чуулганаар хэлэлцэх асуудал, “Чингис” бонд, Оюултолгойн гэрээ, бараа бүтээгдэхүүний үнийн өсөлт болон аймаг орон нутгийн талаар асууж дэлгэрэнгүй хариулт авлаа.

Монгол Улсын Ерөнхийлөгчийн тухай хуулийн 15 дугаар зүйлийн 1 дэх хэсгийг үндэслэн Монгол цэргийн өдөр, Олон улсын эмэгтэйчүүдийн эрхийг хамгаалах өдрийг тохиолдуулан эрүүл мэнд, боловсролын салбар, төрийн байгууллагад олон жил үр бүтээлтэй ажилласан долоон хүнийг Монгол Улсын Ерөнхийлөгчийн зарлигаар төрийн одон, медалиар шагнасныг УИХ-ын дарга гардууллаа.

УИХ-ын дарга З.Энхболдын хөдөө орон нутагт хийж буй томилолт гуравдугаар сарын 31-нд өндөрлөнө хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.