Анхан шатны шүүхээс ял сонсоод буй Хууль зүйн дэд сайд Э.Эрдэнэжамъянтай холбоотой асуудлаар МАХН-ын Ерөнхий нарийн бичгийн дарга Г.Шийлэгдамба мэдээлэл хийлээ. Энэ үеэр түүнээс зарим зүйлийг тодрууллаа.

-    Хууль зүйн дэд сайд Э.Эрдэнэжамъяныг улс төрийн явуулгад өртсөн гэж танай намынхан үзэж байгаа юм уу?

-  Манай намын Бага чуулганаар улс төрийн хэлмэгдүүлэлт Монголд бодитой нүүрлэсэн тухай болон үүнд нэр бүхий хүмүүс өртөж байгаа асуудлыг албан ёсоор ярьж, баталгаажуулсан. Хууль зүйн дэд сайд Э.Эрдэнэжамъяны хувьд МАХН-ны гүйцэтгэх товчооны гишүүн бөгөөд намынхаа асуудлаар интерполд байр сууриа илэрхийлсэн. Хоёрдугаарт интерпол гэдэг байгууллагатай хэн ч цахим хаягаар нь чөлөөтэй харилцах боломжтой. Надад ч тийм бололцоо байгаа. Яг үүнтэй адилаар Э.Эрдэнэжамъян интерполд өөрийн санал бодлоо хүргүүлсэн. Юуны талаар санал хүргүүлсэнийг товч танилцуулбал тэр улс төрийн хэлмэгдүүлэлтэнд өртөж байгаа холбогдогчтой холбоотой асуудлаар саналаа явуулсан. Уг нь өмнөх шүүх хуралдааны үеэр  улсын яллагчийн зүгээс албан тушаалын хэрэг гэж танилцуулж байсан. Ингээд мөрдөн байцаалтын  явцад энэ хүн албан тушаалаа ашиглаагүй юм байна гэдэг нь нотлогдсон. Гэхдээ мөрдөн байцаах үйл ажиллагаанд саад учруулсан байж болзошгүй гэсэн асуудлыг хөндсөн. Хамгийн тодорхой зүйл бол интерполийн зүгээс удаа дараа захидал явуулахдаа Б.Хуяг, Н.Энхтуяа нарыг улаан шугамнаас хассан нь Э.Эрдэнэжамъян гэдэг хүний захидалтай огт холбоогүй гэсэн тайлбарыг хийсэн. Тэгэхээр дарамт намын зүгээс биш улс төрийн нөхцөл байдлыг хурцадгах гэсэн явуулга гэх ойлголтыг төрүүлж байна. Би өөрөө шүүхийн танхимд байсан хүний хувьд хоёр зүйлд эргэлзсэн гэдгээ нуулгүй хэлмээр байна. Эхний асуудал бол иргэний нэхэмжлэгч гэсэн хүн оролцсон нь АТГ-ын ажилтан байсан нь эргэлзээ төрүүлж байна. Шүүхийн тогтоолд улс төрийн албан тушаал хаших эрхийг нь хоёр жилээр хаслаа гэсэн шийдвэр гарсан нь зарим хувь хүмүүст төрж байгаа ойлголтоор улс төрийн хэрэг гэдэг хардлага төрж байна.  

-    Дараа, дараагийн шүүхээс ийм шийдвэр гарвал танай намаас ямар арга хэмжээ авах вэ?

-   Дараагийн давж заалдах шүүхийн эцсийн шийдвэрээр энэ хэргийг хэрэгсэхгүй болгож, цагаатгана гэсэн итгэл үнэмшил бидэнд байна. 

-    Хяналтын шатны шүүхээс шийдвэр гараагүй байхад та бүхэн байр сууриа илэрхийлж байгаа шүүхийн шийдвэрт нөлөөлөх гэсэн оролдого гэсэн хардлагыг төрүүлж байна?

-    Энэ талаар бидний байр суурийг сонсмоор байна гэсэн асуудал тавигдсан.

-   УИХ-ын дарга З.Энхболд Солонгост ажиллах үеэрээ Н.Энхбаяртай уулзаж зарим асуудлаар тохиролцсон гэсэн яриа байна. Энэ үнэн үү ?

-    З.Энхболд даргыг манай намын даргатай уулзсан эсэх талаар бид албан ёсоор мэдэгдэх боломжгүй байна. Хувь хүмүүсийн хооронд болсон асуудал. Албан ёсны төлөвлөгдөж яригдсан уулзалт биш учраас бид мэдээлэл өгөх боломжгүй байна. Хэрвээ уулзсан бол хувь хүмүүс хоорондын л уулзалт байх.

-    Танай намын дарга Н.Энхбаяр хэзээ ирэх вэ?

-    Хэзээ ирэх талаар урьдчилсан мэдээлэл алга.