Эдийн засгийн хөгжлийн сайд Н.Батбаяр, Нийслэлийн засаг дарга бөгөөд Улаанбаатар хотын захирагч Э.Бат-Үүл нар хоорондоо муудалцаж гар зөрүүлсэн гэж ойрын өдрүүдэд их яригдах болсон. Сайд Н.Батбаяр “Энэ жил хотын зам шинэчлэх ажилд бондын мөнгөнөөс ганц ч зоос гаргахгүй” гэж хэлсэн нь Хотын даргын уурыг баржээ. Удтал маргалдсан тэдний хэрүүл даамжирч Э.Бат-Үүл дарга Н.Батбаяр сайдыг шанаадаж  “эрийн хуйх юм бол чи намайг шүүхэд өгөөрэй” гэж хилэгнэсээр дууссан гэдэг.

    Чингэс бондын хөрөнгөөр Улаанбаатар хотод хийгдэж байгаа томоохон бүтээн байгуулалт бол “Гудамж” төсөл юм. Гэвч бондын хөрөнгийг дураараа захиран зарцуулж байгаа Н.Батбаяр сайдаас болж уг төсөл бараг зогсох дээрээ тулаад байна.

    Засгийн газрын 71-р тогтоолоор Эдийн засгийн хөгжлийн яамны харьяа томоохон дэд бүтцийн төслүүдийг шуурхай хэрэгжүүлэх зорилгоор “Гудамж” төслийг хэрэгжүүлж үүний хүрээнд Улаанбаатарын түгжрэл ихтэй 33 уулзварыг шинэчлэх, туул голын дагуу 30 км, сэлбийн голын дагуу 28 км хурдны зам байгуулахаар ажлуудыг эхлүүлсэн нь Шинэчлэлийн засгийн газрын нүүрийг тахалж байгаа цорын ганц бүтээн байгуулалт юм.  Өнгөрөгч 2013 онд 32.4 тэрбум төгрөгөөр нийт 13 уулзварыг шинэчилсэн нь нийслэлийн иргэдийн талархалыг хүлээгээд байгаа билээ. Түүнчлэн www.gudamjtusul.mn веб хаягаар нэвтэрч шинэчилсэн уулзварын түгжрэл, ачааллын камерын бичлэгийг интернэтээр шууд үзэх боломжийг нээж өгснөөр иргэд тохиромжтой цагаар замын хөдөлгөөнд оролцох боломж бүрдсэн. Монголдоо анх удаа интернэтээр замын түгжрэлийн бичлэг шууд үзэх боломжийг “Гудамж” төсөл, “Женералтеч” ХХК-тай хамтарч ийнхүү бүрдүүлсэн байна. Иргэд тохиромжтой цагаа сонгож хөдөлгөөнд оролцсоноор замын ачаалал 20% хүртэл хувиар буурдаг болохыг холбогдох мэргэжилтнүүд тогтоосон байдаг.

    Энэ жилдээ багтаж үлдэж буй 20 уулзварыг шинэчлэх, туул сэлбэ голын хурдны замын ажлыг эхлүүлэх зэрэг томоохон ажлуудыг төлөвлөөд байсан юм. Төслийг анхнаасаа Засгийн газрын бондын хөрөнгө, бусад эх үүсвэрээс санхүүжүүлэхээр шийдсэн байдаг. Гэтэл эдийн засгийн хөгжлийн сайд Засгийн газрын тогтоолыг дур мэдэн зөрж ганц ч зоос хялайлгахгүй гэсний шалтгаан юу вэ. Учир мэдэх зарим хүмүүсийн яриагаар бол “Гудамж” төсөлд иргэд ам сайтай байгаа ч энэ сайшаал магтаал эдийн засгийн хөгжлийн яамруу биш, хотын удирдлагад ихэнхидээ хаяглагдаж байгаа гэнэ. Тиймээс бондын хөрөнгийг их хэмжээгээр зарцуулсан нь өөрт нь улс төрийн нэмэх оноо авчрах биш хотын даргын рейтингийг өсгөхөд зориулагдаад байгаад сайд эгдүүцэж эхэлсэн гэж ярих хүмүүс ч байна. Тиймээс өөрт нь ашиггүй хөрөнгө оруулалтаа зогсоож, тойргоо бараадсан төсөл хөтөлбөрүүдийг тэтгэе гэсэн санаа эндээс цухалзах болсон гэнэ.

    Ямартай ч эдийн засгийн хөгжлийн сайд Н.Батбаяр энэ жил хотынхонд зориулсан бүтээн байгуулалтанд ямар ч зоос гаргахгүй гэж аашилснаар шинэчлэлийн Засгийн газрын цорын ганц гэж тодорхойлж болохуйц бүтээн байгуулалтын томоохон ажил зогсох дээрээ тулаад байгаа нь эрх баригчдын дунд багагүй сандрал үүсгэсэн аж. Үлдэж байгаа 2 жилийн хугацаанд өөр бүтээн байгуулалтын ажил эхлүүлэх найдвар бага байхад ганц явж байсан ажлаа санхүүжүүлэхгүй зогсооно гэдэг байж боломгүй хэрэг гэж Н.Батбаяр сайдыг буруутгаж байгаа хүмүүс АН дотор олон байгаа гэнэ. Сайдын ийнхүү аягласан нь зөв үү? буруу юу?  гэдгийг АН-ынхан дотооддоо нухацтай хэлэлцэж “Гудамж” төслийн цаашдын хувь заяаг тодорхойлохоор ярилцаж байгаа аж.