Цуврал 4.
    Шинэчлэлийн гэх гоё нэртэй ч ухралт, уруудалтын эх суурийг тавьж байгаа Засгийн газрын хувь заяаны асуудал улам хүндрэх болсон талаар улс төрчид эрчимтэй ярих боллоо. Засгийн газрын гишүүд ч танхимаа зоригтой муулж эхэлсэн. Ийм байр суурьтай хүний нэг бол Эдийн засгийн хөгжлийн дэд сайд О.Чулуунбат. Түүний амнаас эдийн засгийн талаар өөдтэй үг гарахаа байсан. Гэхдээ О.Чулуунбат өөрөө дур мэдэн засгаа муулаагүй аж. Түүний ард “эзэн” Н.Энхбаяр байжээ.

    Учир нь Н.Энхбаяр чуулган завсарласан үеэс эхлэн МАХН-ынхаа удирдлагууд руу байнга залгаж засгаас гарах цаг болсныг сануулах болжээ. Түүний үгэнд хамгийн сайн орж байгаа нь О.Чулуунбат. Н.Энхбаяр хөгжимөө захиалж, О.Чулуунбат гүйцэтгэлээ сайн хийжээ.

    Гэхдээ МАХН-ын сайдууд засгаас гарна гэдэгт тийм ч дуртай хандахгүй байгаа гэнэ. Ядаж ирэх жилийг хүргэж асуудлыг ярья гэж өөр хоорондоо ярилцжээ. МАХН-ын сайд нарын энэхүү байр суурь “эзэн” Н.Энхбаярт таалагдахгүй байгаа аж. Тийм учраас Н.Энхбаяр намынхаа удирдалгууд руу утасдаж “Манай нам ард түмнээ их өр зээлд оруулсан Засгийн газартай хамтармааргүй байна. Та нар эдийн засаг хүндрээд байхад ямар арга хэмжээ авч байгаа юм бэ. Эдийн засгийг хүндрүүлж байгаа улс төрийн хүчний талд биш ядуурч байгаа ард түмнийхээ талд байх цаг ирсэн” гэх мэтээр сургаал, дарамт хоёрыг зэрэг “хайрласан” бололтой. Өөрөөр хэлбэл “Ард түмний дэмжлэг албан тушаалаас илүү хүчтэй” хэмээх афоризмаа л айлджээ.

    Н.Энхбаярын энэхүү шахалт дээр дэд сайд Э.Эрдэнэжамьянг огцруулан төрийн ажил 2 жилийн хугацаанд эрхлэх эрхгүйгээр ялласан явдал “тос” нэмжээ. Өөрөөр хэлбэл Н.Энхбаярыг дэмжиж цор цор хийгээд байвал ингэдэг юм шүү дээ гэсэн эрх баригчдын сануулга маягийн ялыг “эзэн” их таагүйгээр хүлээн авчээ.

    Тэгээд ч хамтрагч АН-ынхан нь МАХН-ынханд угаасаа таагүй хандаж ирсэн. Олон удаа “гол” гаргасан. Н.Энхбаярыг хорьж яллахаас эхлээд дэд сайд Э.Эрдэнэжамьянг хүртэл огцруулахаар болов. Энэ бүх шийдлүүд нь “Ямар хүмүүстэй хамтарсанаа ойлгох цаг ирлээ” хэмээх ухаарлыг өгч эхэлжээ. 

    Харин Н.Энхбаярын Засгийн газраас гарах ёстой гэдэг саналыг МАХН-ынхнаас Ерөнхий нарийн бичгийн дарга Г.Шийлэгдамба гардан удирдаж байгаа гэж эх сурвалж мэдээллээ. Тэгээд ч Г.Шийлэгдамба “манайхан Засгаас гарах чиглэлтэй байгаа. Харин сайд нар маань дургүй байдаг” гэх мэт утгатай зүйлийг зарим хүмүүст ярьсан сураг чихний үзүүрт сонсогдож эхлэв. Өөрөөр хэлбэл намын гал тогоог хариуцдаг Ерөнхий нарийн бичгийн дарга Г.Шийлэгдамба сайд нараа засгаас эргүүлж татах арга, самбааг боловсруулж байгаа аж.

    Үйл явдал ингэж өрнөвөл Шинэчлэлийн Засгийн газрын хувь заяа бараг л “мориндоо мордлоо” гэдэг болох нь. Тийм ч учраас АН-ынхан ойр ойрхон хуралдаж, сөрөг хүчин жагсаал цуглаанд бэлдэж эхлэв.