Ардчилсан намаас сар бүрийн эхний долоо хоногийн пүрэв гаригт зохион байгуулдаг "4-11" уулзлат болж өнгөрлөө. Уулзалтанд АН-ын ерөнхий нарийн бичгийн дарга Ц.Оюундарь, нарийн бичгийн дарга О.Чулуунбилэг, Нийслэлийн иргэдийн төлөөлөгчдийн хурлын дарга Д.Баттулга, Нийслэлийн АН-ын дарга Ц.Баатархүү нар оролцож "Ухаалаг Улаанбаатар" хөтөлбөрийн талаар танилцууллаа. АН-ын "Монгол хүн 2020" мөрийн хөтөлбөр болон Монгол улсын Ерөнхийлөгчийн дэвшүүлсэн "Том төрөөс ухаалаг төр лүү" санаачилгыг дэмжиж Улаанбаатар хотод "Ухаалаг хот" хөтөлбөрийг хэрэгжүүлэхээр болсон талаар НИТХ-ын дарга Д.Баттулга хэллээ.
Тус хөтөлбөрийг хэрэгжүүлсний ач холбогдол нь иргэд төрийн үйлчилгээг гэрээсээ болон гар утаснаасаа авч чадахад орших юм. Тухайлбал гэрийн тань ойролцоох автобусны буудал дээр таны суудаг автобус хэзээ ирэх мэдээллийг та гар утаснаасаа авдаг болно. Мөн төрийн бүхий л үйлчилгээг гар утас эсвэл интернэтээс авч болох боломжтой болж байгаа юм.
Дээрх зурагт заасан төрийн олон үйлчилгээг шат дамжлага дамжихгүйгээр авах боломжтой
Жишээ нь иргэд гар утсаараа төрийн үйлчилгээний мэдээлэл авч, шинээр худалдан авах гэж буй барилгын талаарх мэдээллээ оруулаад хайхад тухайн барилга зөвшөөрөлтэй эсэх, хэзээ ашиглалтад орсон, Хотын дарга хаана ямар ажил хэрэгжүүлж байна зэрэг бүхий л мэдээллийг шуурхай авдаг болох юм.
Мөн тус хөтөлбөрийн хүрээнд хотын дүрмийг боловсруулж байгаа аж. Иргэд нийслэлийн иргэн болохын тулд хотын дүрэмд суралцаж түүнийг дагаж мөрддөг болно гэдгийг албаныхан хэлж байна. Уг хөтөлбөр 2020 он хүртэл хэрэгжинэ.
Цогц байдлаар "Ухаалаг Улаанбаатар" хөтөлбөрийг хэрэгжүүлснээр дараахь байдлаар өөрчлөгдөнө
• Иргэдэд шударга, шуурхай чирэгдэлгүй, хямд үйлчилдэг хот болно
• Хотыг ухаалгаар удирдах мэдээлэлтэй болно
• Авлигагүй, бизнест ээлтэй хот болно
• Хотын хэмжээнд сайн засаглалыг бүрдүүлнэ
• Салангид бус, нэгдсэн системтэй хот болно
• Төрийн үйлчилгээний хурд 50-аас 90 хувь хурдсана
• Улаанбаатар хотод бизнес чвуулах зардал 20-оос 50 хувь хямдарна
• Гэмт хэргийн гаралт 20-оос дээш хувиар буурна
• Нийслэлийн нутгийн захиргааны байгууллагуудын үйл ажиллагааны үр ашгийг салбар бүрт 10-аас 100 дахин нэмэгдүүлнэ
• Иргэд 200-аас олон төрлийн үйлчилгээг нэг цонхоор авдаг болно
• Нээлттэй мэдээллүүдийг иргэн бүрт хүргэх суваг бий болгоно
Т.Энхэлээ
Сэтгэгдэл (1)