Цаг үеийн асуудлуудаар чиглэл өгөх шаардлагатай байгаа тул Засгийн газрын тэргүүн энэ удаагийн “Ерөнхий сайдын 30 минут” уулзалтыг аймгийн засаг дарга нарын видео уулзалттай хамт хийлээ.

1000 айлын орон сууц барих ажлаа хугацаа алдалгүй эхлүүл, энэ талаар Төрийн орон сууцны корпорацийнхантай нарийвчилж ярилц гэсэн үүрэг чиглэлийг Ерөнхий сайд Н.Алтанхуяг уулзалтын эхэнд аймгийн удирдлагуудад өглөө. Мөн Хэнтий аймгаас үлгэр дууриалал авч Засаг дарга нарыг сэтгүүлчидтэй 30 минут уулзалт хийж байх, мөн Засгийн газрын харьяа 11-11 төв шиг нутгийн иргэдийнхээ санал хүсэлтийг сонсдог төвийг аймагтаа байгуулж эргэх холбоотой ажиллахыг зөвлөлөө. Мөн "Бүтээн байгуулалт"-ын цагтай болж хийж буй ажлаа тайлагнаж байхыг санал болгов.

Ерөнхий сайд өнгөрсөн даваа, мягмар гаригт Хэнтий, Говьсүмбэр аймгуудад ажилласан юм. Энэ үеэр иргэд орон нутагтай холбоотой асуудлыг түлхүү хөндөн тавьжээ. Мөн бизнес эрхлэгчдийг дэмжих зорилгоор хэд, хэдэн сангийн хөрөнгө орон нутагт хуваарилагдаж очдог тухай ойлголт тааруу, зарим нэг нь “Жижиг, дунд үйлдвэрлэлийн зээл гэж юм байдаг л гэсэн. Тэр нь бидэнд олдох биш дээ” гэх аястай байр суурь илэрхийлсэн нь мэдээлэл дутмаг байгаатай холбоотой. Тийм учраас Сумын хөгжлийн сангийн зээл, Жижиг, дунд үйлдвэрлэлийг дэмжих сангийн зээл, Хөдөлмөр эрхлэлтийг дэмжих сангийн зээл, Орон нутгийн хөгжлийн сангийн хөрөнгийн зорилго чиглэл, энэ онд хэдий хэмжээний зээлийг гаргаж иргэдийнхээ бизнесийг дэмжих боломжтой талаар тодорхой мэдээлэл өгөх шаардлага байна гэдгийг онцлон захилаа.

Энэ жил зургаан аймгийг нийслэлтэй автозамаар холбохоор төлөвлөсөн. Орон нутгийн автозамын ажлыг дөрөвдүгээр  сардаа эхлүүл, бэлтгэлийг нь одооноос сайн ханга гэж Ерөнхий сайд санууллаа. “Гудамж” төслийг аймгийн төвүүдэд эхлүүлнэ. Засаг дарга нар төслийнхөнтэй холбогдоорой гэлээ. Нийслэлийн хувьд энэ жил “Гудамж” төслийн хүрээнд Туулын хурдны замын бүтээн байгуулалтад төвлөрч, хотын доторх зам гудамжийг нийслэлийн төсвөөр голчлон хийнэ.

Иргэдийн хөдөлмөр эрхлэлт, бизнесийг дэмжихэд зориулан орон нутагт Засгийн газраас багагүй төсөв хөрөнгө хуваарилдаг. Гэтэл энэ хөрөнгө, төсөлд яаж хамрагдах талаар хөдөөгийн иргэд тодорхой мэдээлэлгүй байгаа нь Хэнтий, Говьсүмбэрт ажиллах үеэр анзаарагдлаа гэж Ерөнхий сайд хэлэв.

Мөн Шар усны үер, хуурайшилт, түймрээс сэргийлэх сэрэмжүүлэг анхааруулга сайн явуулаарай. Шүлхийтэй холбогдуулан тогтоосон хорио цээрийн дэглэмийг маргаашийн Засгийн газрын хуралдаанаар цуцална, гэхдээ мал, малын гаралтай түүхий эдийн хөдөлгөөнд үргэлжлүүлэн хяналт тавих шаардлагатай шүү гэж Ерөнхий сайд төгсгөлд нь анхаарууллаа.

Энэ долоо хоногт 11 аймагт оношилгооны төв нээгдсэн. Ерөнхий сайдын төсвийн 50 тэрбум төгрөгийн хөрөнгөөс санхүүжүүлсэн энэ ажил орон нутагт хамгийн өгөөжтэй хөрөнгө оруулалт болсныг аймгийн удирдлагууд онцоллоо.

Орон нутгийн ажил амьдралтай холбоотой эдгээр мэдээллийн дараа Ерөнхий сайд Н.Алтанхуяг уламжлал ёсоороо сэтгүүлчдийн асуултад хариуллаа.