“Ерөнхий сайд-30 минут” ээлжит уулзалт өнөөдөр аймгуудын Засаг дарга нартай хийдэг цахим хуралтай хамт боллоо. Энэ үеэр тэрбээр сэтгүүлчдийн сонирхсон асуултад хариулт өгсөн юм.

-Засгийн газрын мөрийн хөтөлбөрийн хэрэгжилт 30 хувьтай байна гэж МАН-ын бүлгээс мэдээлэл хийсэн. Өнөөдөр хөтөлбөрийн хэрэгжилт ямар байгаа талаар мэдээлэл өгнө үү?

-Тоогоор хөөцөлдөх хэрэг байна уу. Манай мөрийн хөтөлбөрийн биелэлт 42,6 хувьтай байна гэсэн тоо гарсан л байна лээ. Засгийн газар байгуулагдаад нэг жил долоо сарын хугацаа өнгөрч байна. Ер нь ард иргэдэд хүрсэн, ахуй амьжиргаанд нь нэмэртэй болсон, бодитой бүтээн байгуулалтаар хэмжинэ үү гэхээс биш тоогоор маргаад яахав.

-“Гудамж” төслийн зарим уулзварыг санхүүжүүлэхгүй гэсэн мэдээлэл байна?

-“Гудамж” төслийн хүрээнд хамгийн чухал эхлүүлэх ажил бол Туулын хурдны зам. Тэр зам руу хөрөнгө хүчээ төвлөрүүлж байна. Бусад зүйлийг нийслэлийн хөрөнгөөр хийж болно. Дээр нь аймгуудын төвийг засварлахад нэлээд хэсэг мөнгөө шилжүүлж байгаа. Уг нь 15 уулзвар төлөвлөсөн байсан. Тэрнээс заримыг нь нийслэлийг өөрөө хий гээд үлдээж байгаа.

-Авлигажсан төсөв гэдэг зүйлийг Засгийн газар гаргаж ирсэн. Мөн хариуцлага алдсан компаниудыг ч нэрлэсэн. Эдгээр компаниудад хариуцлага тооцсон зүйл байна уу?

-Хэнтий аймагт 15 объектын санхүүжилтийг түр зогсоочихсон байгаа. Газар дээр нь аудитынхан очиж анхны төсөвт өртөг нь хичнээн байсан бэ, одоо хичнээн болчихоод байгааг шалгасан. УИХ-аар энэ асуудлыг хэлэлцүүлээд Засгийн газарт ирэхдээ ийм, ийм хүмүүст хариуцлага тооц гэдэг  аудитын дүгнэлттэй хамт ирэх байх гэж бодож байна. Тухайн үед нь хариуцлага тооцно доо.

-Эдийн засаг хүндэрч байгаа энэ үед Уул уурхайн сайд, Эдийн засгийн хөгжлийн сайдад хариуцлага тооцох хэрэгтэй гэсэн зүйл яригдаж байна?

-Эдийн засаг мундаг сайн байхгүй байгаа нь үнэн. Дэлхийн эдийн засаг бол бүр муу байгаа. Дэлхийн эдийн засаг муудахаар Монголд яагаад нөлөөлдөг вэ гэхээр манай гадагшаа гаргаж зардаг бүтээгдэхүүний үнэ уначихдаг. Нүүрсний үнэ өмнөх жилийнхээс бага байгаа.  Монгол банк, Засгийн газар хамтарч тодорхой ажлуудыг хийж байгаа. Ойрын 10 хоногт ийм, ийм арга хэмжээ авах нь зүйтэй юм гэдгийг гаргаж тавина.

-Засгийн газар анх байгуулагдахдаа  амралтгүйгээр ажиллана гэж байсан. Одоо Засгийн газрын хуралдаан баасан гариг бүр хуралддаг болсон. Цаашид ажлын таван өдрөөр ажиллах уу?

-Ер нь бид сараараа тооцоод үзэхэд олон сар илүү ажилласан байна лээ. Сая УИХ-ын чуулган завсарлаад баасан гарагт хуралддаг болсон. Хүн юм болохоор манай Засгийн газрын гишүүд ядарч зарим нь эмнэлэгт хэвтсэн. Энэ бол амралтгүй ажиллана гэдгээсээ буцаж байгаа хэрэг биш. Ирэх 7 хоногоос эхлээд хагас сайнд хуралддаг хуваарь руугаа орно.

-Төсвийн орлого тасарч байгаа. Төсөв тодотгох уу?

-Төсвийн орлого тодорхой хэмжээгээр тасарч байгаа. Өмнөх жилийнхээс илүү хэмжээнд гарсан. Харин үнэ нь уначихсан учраас илүү хэмжээний мөнгө орж ирээгүй. Тэр агуулгаараа төсөв бага зэрэг тасалдаж байгаа. 

-50 мянгатын дэвсгэрт хэвлэгдэх талаар Сангийн сайд мэдээлсэн. Энэ талаар мэдээлэл байна уу?

-Өнөөдөр өглөө Монгол банкны Ерөнхийлөгчөөс асуухад 50 мянгатын дэвсгэрт хийхгүй гэсэн. “Батаар”-ын зурагтай мөнгө дэвсгэрт хэвлэнэ гэдэг цуурхал шүү.

-Дулааны үнэ хоёр дахин нэмэгдэнэ гэх мэдээлэл байна?

-Дулааны үнэ хоёр дахин өснө гэдэг ойлголт угаасаа байхгүй.

Хөгжлийн банкнаас төмөр замын төслийг санхүүжүүлэх мөнгийг гаргаж өгөхгүй байгаа гэсэн?

-Тийм зүйл байхгүй.