Өнөөдөр Төрийн ордонд болсон Улс төрийн намуудын Ерөнхий нарийн бичгийн дарга нарын уулзалтад парламентад суудалтай болон суудалгүй 13 намын төлөөлөл оролцож, Шинэчлэлийн Засгийн газрын үйл ажиллагааны талаар болон Улс төрийн намуудын тухай хууль, Сонгуулийн тухай хуулийн төслийн талаар нээлттэй хэлэлцэв.

МАН-ын Ерөнхий нарийн бичгийн дарга Ж.Мөнхбат, “Энэхүү уулзалтын өмнө тус намын гишүүд Улаанбаатар хот болон аймаг, орон нутагт ажиллаж, иргэд сонсогчидтой уулзан тэдний санал бодлыг сонссон. Иргэдэд үнийн дарамт хүндээр тусч, зарим нэг жижиг дунд бизнес эрхлэгчид үүд хаалгаа барьж байна. Өнөөдөр улс орны эдийн засаг маш хүнд байдалд орлоо. Шинэчлэлийн Засгийн газар бүрэн эрхийнхээ хоёр жилийг өнгөрүүлчихээд байхад мөрийн хөтөлбөр нь 30 хүрэхтэй үгүйтэй хувийн хэрэгжилттэй байна. Уг нь өдийд бараг 50 хувийн хэрэгжилттэй байх ёстой. Засгийн газрын үйл ажиллагаа, эдийн засгийн нөхцөл байдлын талаар өмнө нь иргэдийнхээ үгийг сонссон, өнөөдөр улс төрийн намуудын байр суурийг сонсож байна, дараагийн удаад иргэний хөдөлгөөний байгууллагуудтай уулзалт зохион байгуулна” гэв.

Мөн тэрээр Улс төрийн намын тухай, Улс төрийн намын санхүүжилтын тухай хуулийн төсөл боловсруулах ажлын хэсгийг УИХ-ын гишүүн С.Баярцогтоор ахлуулсаны эсрэг байр суурьтай байгаагаа илэрхийлэв. Учир нь ёс зүйн хариуцлага хүлээсэн хүнээр голлох хуулийн ажлын хэсгийг ахлуулах учиргүй гэж тэрээр үзэж байгаа аж.

Түүнчлэн Монголын Ногоон намын Ерөнхий нарийн бичгийн Ч.Мөнхбаяр Засгийн газар цаашид үйл ажиллагаагаа явуулах ёс зүйн эрхгүй, огцрох цаг нь болсон гэсэн бол МАХН-ын Ерөнхий нарийн бичгийн зөвлөх Г.Дугаржав улс орны эдийн засгийг бонд гаргах, хөрөнгө оруулалт татах зэргээр “цус сэлбэх” хэрэгтэй гэлээ. Иргэний хөдөлгөөний намын Дэд дарга Б.Занаа Засгийн газар үнийн өсөлтийг барьж чадаагүй, огцрох ёстой хэмээн үзэж байгаагаа хэллээ. Тэрээр Улс төрийн намуудын тухай болон Сонгуулийн тухай хуулийн төсөлтэй танилцахад олон улсын нэгдэн орсон гэрээ конвенц болон Үндсэн хуулийн үзэл баримтлалыг зөрчсөн зүйл заалттай байна гэв.

Энэ үеэр үг хэлсэн бусад намын төлөөлөл ч Шинэчлэлийн Засгийн газрын үйл ажиллагааг хангалтгүй дүнтэй байна гэж дүгнэсний зэрэгцээ дээрх хоёр хуулийн төсөл өмнөх хуулиасаа сайжирч дэвшсэн зүйлгүй, холбогдох хууль тогтоомжийн заалттай зөрчилдсөн, маргаан дагуулсан санал авах электрон машины асуудлыг шийдвэрлээгүй, хуулийн нэр томъёо нь тодорхойгүй, утга найруулгын алдаатай байсан хэмээн шүүмжлэв. Иймд уг хуулийн төсөл боловсруулах ажлын хэсэгт намуудын төлөөллүүдийг ажиллуулах, нэгдсэн чуулганы нээлтэд гадаад дотоодын төлөөлөгчдийг урилгаар оролцуулдгийн адил тэднийг ч бас хамруулдаг байх, цаашилбал улс орны асуудалд парламентад суудалтай, суудалгүйгээс нь үл хамаарч оролцуулдаг байх хэрэгтэй гэсэн саналуудыг дэвшүүлэв.