2008 оны долдугаар сарын 01-ний үймээнээр МАН төв байраа шатаалгаж өмч хөрөнгөөрөө хохирсон. Төрөөс уг үймээнээр учруулсан эд хөрөнгийн хохирлыг барагдуулж МАН хуучин байрныхаа нөхөн төлбөрт улсын төсвөөс 9 тэрбум төгрөг гаргуулж авсан байдаг. Ингээд улсын төсөв болон намын гишүүд, дэмжигчдийн хандивын хөрөнгөөр тусгаар тогтнолын ордон хэмээх байраа богино хугацаанд барьж ашиглалтанд оруулсан билээ. Барилгын гүйцэтгэгчээр тус намын удирдах зөвлөлийн гишүүн Н.Төмөрхүүгийн “Өндөр буянт холдинг” ХХК ажилласан. Мөн олон жижиг гүйцэтгэгч компаниуд тусгаар тогтнолын ордонг барихад хамтран ажилласан юм.
  
 Уг ордонд МАН-аас гадна маш олон бизнесийн байгууллагууд түрээсийн гэрээгээр үйл ажиллагаа явуулдаг. Улс төрийн намуудын хуулийг шинэчлэн батлахтай холбогдуулан аливаа улс төрийн намыг өмч хөрөнгөтэй байх, түүнийг түрээслүүлж аж ахуйн ашиг олохыг хориглох тухай асуудал нэлээд хүчтэй яригдах болсон. Мөн УИХ-д суудалтай намуудыг тусгаар тогтнолын ордонд оруулж, улс төрийн намуудын нэгдсэн байр болгох тухай саналыг ч ярилцсан байдаг. УИХ-ын дарга З.Энхболд “МАН улсаас 9 тэрбум төгрөг авсан юм чинь байрандаа бусад намуудаа оруулчихаач” гэдэг саналыг тавьсан ч цаадуул нь өөрсдийнх нь өмч хөрөнгө рүү дайрч байна гэж маш эмзэг хүлээж авсан тухай яриа олны өмнө ил болсон байдаг.

    Тусгаар тогтнолын ордонг хэдэн төгрөгөөр бариулсан нь одоо хэр тодорхойгүй байдаг. Улсын төсвөөс гаргаж авсан мөнгийг эс тооцвол хандивлагчид хэдэн төгрөг өгснийг хэн ч мэддэггүй.

    Тэгвэл Аудитын газраас тусгаар тогтнолын ордон бариулсан санхүүд шалгалт хийхээр болсон байна. Барилгыг гүйцэтгэсэн “Өндөр буянт холдинг” болон бусад туслан гүйцэтгэгчдийг ч мөн давхар шалгах болжээ. Эрх баригч АН-ынхан уг байртай холбоотой санхүүгийн бүх асуудлыг ил тодорхой болгох ёстой гэсэн байр суурийг илэрхийлжээ. Ингээд улсын төсвөөс гаргуулж авсан 9 тэрбум төгрөгийг хэрхэн зарцуулсныг тогтоож, уг байрыг ямар эх үүсвэрээр санхүүжүүлж барьсан болохыг олон нийтэд зарлахаар болсон нь МАН-ынханыг нэлээд сандаргах болсон байна. Намынхаа байрыг бариулахад УИХ-ын гишүүн Н.Номтойбаяр 1 тэрбум, гишүүн асан Ш.Сайхансамбуу 1 тэрбум, УИХ-ын гишүүн О.Содбилэг 500 сая төгрөг хандивласан гэх ба дээрхи эрхмүүд ч үүнийг үнэн гэдгийг баталсан байдаг.
     Тэгвэл эдгээр эрхмүүдээс гадна өөр маш олон хүнээс хандив мөнгө цуглуулсан гэдгийг эх сурвалж онцолж байна. Баттай бус эх сурвалжийн мэдээллээр тусгаар тогтнолын ордон бариулах хандивт 25 тэрбум  төгрөг цугласан гэнэ. Тухайн үеийн намын удирдлагууд хандивлагчдаас мөнгө авахдаа “намын шат шатны байгууллага, гишүүддээ хандив өгсөн гэдгийг тань нээлттэй сурталчилна” гэж хэлж байсан. Гэвч ордон ашиглалтанд орсны дараа хэн хэдэн төгрөг хандивласан, нийт ямар өртгөөр барилгын ажлыг гүйцэтгэв гэдгийг хэнд ч хэлээгүй билээ. Иймд уг барилгыг босгоход хандив өгсөн хүмүүс ч өөрдийнх нь хувь нэмэр оролцоог ил зарлаагүйд гомдоллож уг асуудлаар шалгалт явуулж нийтэд ил болгохыг аудитын газраас хүсэх болсон байна. Тэдний үзэж байгаагаар МАН-ынхан уг байрыг бариулахад бусдаас маш их хэмжээний хөрөнгө босгож, томоохон мөнгө угаасан луйврыг хийсэн гэж үзэж байгаа аж. Ийнхүү нэг талаасаа төсвийн хөрөнгийн зарцуулалтыг тодруулах, нөгөө талаасаа хандивлагчдын гомдлыг тайлж, тусгаар тогтнолын ордны санхүүг нийтэд ил тод болгохоор аудитын шалгалт хийхээр болсон нь тус намын шинэ, хуучин удирдлагуудыг сандаргаж эхлээд байгаа аж.